MASIMULIZI

RIWAYA : TEN CHAPTERS

SEHEMU YA 17

ILIPOISHIA SEHEMU ILIYOPITA

Lina akaitazama saa aliyoivaa katika mkono wake wa kulia Muda ulikuwa umekwenda sana.

" Du ! muda umekwenda sana na giza limeanza kuingia.Hii inamaanisha kwamba kesho nitalazimika kurejea tena sehemu hii ili kuendelea na simulizi yangu .Nataka nimalizie kusimulia ni jinsi gani nilijiingiza katika mapenzi na jinsi nilivyokutana na Jimmy ambaye mimi ninamuona ni kama shetani aliyevaa mwili wa binadamu halafu nitamalizia na nini kilinitokea katika sehemu hii siku ile ya jumamosi na kuifanya sehemu hii iwe ni moja kati ya sehemu ya kumbukumbu kubwa katika maisha yangu.Simulizi ya mahla hapa ikimalizika nitaelekea tena sehemu nyingine na nyingine tena hadi nimalize kuziaga sehemu zangu zote za muhimu" akawaza Lina akakunja kompyuta yake ndogo akaiweka katika mkoba halafu akasimama akajinyoosha kidogo.Kiza tayari kilianza kuingia na hakukuwa na mu yeyote aliyeonekana ufukweni.

" Kwa heri bahari,kwa heri mwamba wangu niliokupenda na kukaa juu yako nikafurahia uumbaji wa mwenyezi Mungu.Nitakuja tena kesho kuendelea na simulizi yangu" akasema Lina na kuuweka begani mkoba wake uliokuwa na kompyuta na kisha akachukua chupa yake ya mvinyo akapiga funda mbili akatoa sigara akaiwasha na kuanza kuondoka taratibu..

ENDELEA..........................................................................

Siku nyingine ikawadia na saa tisa za alasiri Linah akawasili tena Beach Paradise hoteli kuendelea kuandika simulizi yake aliyoanza kuiandika siku iliyotangulia lakini akashindwa kumaliza kutokana na muda.Taratibu akashuka garini kama kawaida yake.Hakumjali mtu akachukua pakiti la sigara akatoa sigara moja na kuiwasha kisha akaegemea gari na kuanza kuivuta sigara ile huku akipuliza moshi mwingi hewani.Alionekana kuifurahia ladha ya sigara ile kwa jinsi alivyokuwa akitabasamu kila alipopuliza moshi hewani.Baada ya kupiga mikupuo kadhaa ,akasikia simu yake ikiita toka ndani ya gari.Akaichukua na kuizima bila hata kutazama nani alikuwa anampigia .

" Huu ni muda wangu wa kuitafakari dunia hii iliyojaa kila aina ya unyama na sitaki mawasilino na kiumbe yeyote aitwaye binadamu kwa sasa.Its just me and this cruel world" akasema Linah kwa sauti ndogo kisha akaitupa simu ile katika kiti .Akauchukua mkoba wake wenye kompyuta yake ndogo akauvaa begani halafu akachukua na chupa ya mvinyo akaitazama na kutabasamu akafungua na kupiga funda moja na kutikisa kichwa chake .

" Mhhh...so heavy...I like this whisky" akasema Linah huku akitabasamu na kuitazama tena chupa ile

" This is my only true friend now..I feel so good ninapokuwa naye..ananisaidia kupunguza mawazo ya ulimwengu huu katili" akasema Linah.

Akalifunga gari lake na kuanza kutembea taratibu kuelekea katika sehemu yake anayopenda kukaa pale juu ya mwamba..Siku hii ya leo Linah alivaa sketi fupi nyeupe iliyoiacha sehemu kubwa ya mapaja yake mazuri yenye kung'aa ikiwa wazi.Kwa juu alivaa kishati kidogo kilichomfika kifuani ambacho hakuwa amekifunga vifungo hivyo kulifanya tumbo lake lote kuwa wazi .Matiti yake mazuri yaliyosimama yalikuwa yamesitiriwa na sidiria nyeupe iliyoyakamata vyema na kuzidi kumpendezesha msichana huyu mwenye uzuri wa kupindukia.Shingoni alikuwa amevaa mkufu wa thamani kubwa wa dhahabu .Hakumjali mtu yeyote yule ,akatembea taratibu huku akiendelea kuivuta sigara yake na mkononi akiwa na ile chupa yake ya mvinyo.Sehemu kubwa ya watu waliokuwa wamekuja siku hii ya leo kuchukua picha za kumbu kumbu ya harusi katika ufukwe wa hoteli hii waligeuza vichwa vyao kumshangaa Linah.Watu wale wakaanza kusemezana wao kwa wao na wakiulaani utandawazi ambao waliamini ndio uliopelekea binti kama yule kutembea akiwa vile..Linah hakuwajali akaendelea na safari yake ya kuelekea katika mwamba anaopenda kukaa mara nyingi akija hapa Beach Paradise hoteli.

Akapanda juu ya mwamba ule akasimama na kuyatazama mawimbi ya bahari yalivyokuwa yakiupiga mwamba ule aliokuwa amesimama juu yake akatabasamu .

" Kabla sijaendelea kuandika simulizi yangu,ngoja kwanza nishuke kule chini nikakumbuke japo kwa dakika chache furaha ile niliyokuwa nikiipata kipindi kile kwa kupigwa na mawimbi ya bahari " akawaza Linah halafu akavua kile kisketi chake kifupi na kubakiwa na nguo ya ndani nyeupe akashuka hadi chini ya mwamba sehemu ambayo maji ya bahari hugonga na kutawanyika hewani.Akakaa katika sehemu ile ambayo alizoea kukaa na maji yakaanza kumrukia,akatabasamu.

" Maji haya yalinifanya nipende kuja mahala hapa mara kwa mara .Ninasikia furaha ya ajabu sana lakini haina maana tena ya kuwa na furaha katika ulimwengu huu.Furaha pekee niliyonayo kwa sasa ni ndugu zangu ambao ninafurahi kila nikiwaona wanaendelea vizuri na maisha yao." akawaza Linah huku akiyashika maji na kuyachezea.

" Ahsante sana bahari kwa kuwa sehemu ya furaha yangu wakati ule.Ulinifanya niifurahie dunia na kutabasamu kila mara nilipokuona." akasema Linah na kwa mbali macho yake yakaonekana kama yanalengwa na machozi.

" Muda unakwenda kwa kasi ngoja nikaendelee na kuandika simulizi yangu” akawaza Linah ,akitoka majini na kupanda tena juu mwambani akajifuta maji na kuchukua chupa ya mvinyo akanywa funda mbili kisha akachukua sigara akaiwasha na kuanza kuvuta huku akitazama bahari na kuwafurahia ndege wengi waliokuwa wakiruka juu yake.

" Mungu aliumba vitu vizuri sana lakini sisi wanadamu tumeiharibu dunia kabisa" akawaza Linah akaizima ile sigara na kuichukua kompyuta yake akaiweka mapajani na kuiwasha.

" sasa niendelee na simulizi yangu.Sitaki tena kuja mahala hapa .Bado nina sehemu nyingi za kwenda.kutembelea na kuzishukuru kabla sijatoweka kama upepo" akawaza LInah.Akatazama mahala alipoishia jana.na kabla hajaendelea akanywa tena funda moja la mvinyo.

" jana nilianza kuelezea maisha yangu katika shule ile ya kimataifa ya wasichana iliyoko nje kidogo ya jiji la Nairobi nilikohamishiwa baada ya wazazi wangu kuhofia pengine ningeweza kujiingiza katika vishawishi kutokana na uzuri wangu kwani tayari nilikuwa nimeanza kupevuka na kuwa gumzo mtaani.Nilielezea namna Christine Kumuhoza ambaye alikuwa ni rafiki yangu mkubwa pale shuleni alivyonipa ushawishi wa kutafuta rafiki wa kiume.Alinielezea raha anazopata toka kwa rafiki yake wa kiume.Mimi sikuwa nikihitaji kuwa na rafiki wa kiume kwa wakati huo kwa sababu hilo ni moja ya jambo ambalo lilichangia mimi kuhamishiwa nchini kenya katika shule ya wasichana ili kunilinda na wanaume wakware.Siku zote niliwaheshimu na kuwasikiliza sana wazazi wangu.Sikutaka kufanya yale mambo ambayo hawakutaka niyafanye.Na moja ya mambo ambayo hawakutaka niyafanye nikiwa shuleni ni kujiingiza katika mahusiano ya kimapenzi.Niliachana na Christine nikapanda kitandani kulala.Siku hiyo sikuweza kupata usingizi nikifikiria maneno ambayo aliniambia Christine kuhusu kuwa na rafiki wa kiume.Taratibu nilijikuta nikianza kushawishika kuwa na rafiki wa kiume .Nilitaka nizipate hizo raha ambazo Christine alisema kwamba huwa anazipata toka kwa huyo rafiki yake .Sikuwahi kufanya mapenzi na sikufahamu yakoje ila kupitia filamu ambazo nilikuwa nikitazama na kupitia vitabu vya hadithi ambavyo nilikuwa nikisoma nilijua kwamba mapenzi ni matamu .Nilianza kutamani kujaribu siku moja kufanya mapenzi hayo kama wenzangu.Kila siku mawazo hayo ya kuwa na rafiki wa kime yakawa yananijia kichwani lakini nikajitahidi kuyapuuza na kuongeza juhudi katika masomo.Hatimaye tukafunga shule na kurejea nyumbani kwa mapumziko.Kila tulipofunga shule baba alikuwa na kawaida ya kututumia tiketi za ndege na ndivyo alivyofanya safari hii.Likizo ilikuwa nzuri kwani furaha ilirejea tena nyumbani kwetu baada ya watoto wote kurejea nyumbani.Wazazi waliongeza ulinzi mkubwa kwangu na sikutakiwa kutoka na kwenda kuzurura hovyo wakihofia pengine ningeweza kuingia katika vishawishi kutokana na uzuri wangu uliozidi kuongezeka kila siku.Muda mwingi niliutumia kwa kujisomea mwenyewe nyumbani.Wakati mwingine Savanna rafiki yangu ambaye naye anasoma nchini Kenya lakini shule tofauti na mimi alikuwa akija nyumbani tukasoma pamoja.

Baada ya siku za mapumziko kumalizika tulianza kujiandaa kurejea tena shuleni.Savanna alinishawishi safari hii nsitumie usafiri wa ndege bali nijaribu kusafiri kwa basi na kufurahia uzuri wake.Nilijikuta nikivutika kusafiri kwa basi kutokana na maelezo ya Savanna.Nilimweleza baba kwamba nilipenda kusafiri kwa basi lakini akagoma.Kwa siku tatu mfululizo nliendelea kumshawishi baba anikubalie nisafiri kwa basi pamoja na wanafunzi wengine kwani kuna mambo mengi niltaka kujifunza njiani.Baba alikubali kwa shingo upande lakini kwa sharti kwamba nitasafri kwa basi mara moja tu na hataniruhusu tena mimi na wadogo zangu tusafiri kwa basi .Nilifurahi sana kukubaliwa kusafiri kwa basi kuelekea shuleni nchini Kenya.Safari hii ya basi ni safari ambayo sintaisahau katika maisha yangu kwa sababu ndiyo ilinikutanisha na Jimmy shetani mwenye mguu mmoja ambaye amevaa umbo la binadamu.Mpaka leo hii huwa ninajuilaumu sana kwa nini sikusikia ushauri wa baba yangu ambaye alikuwa amekataa kata kata kuniruhusu kusafiri kwa basi." Linah akasimama kuandika akachukua chupa yake ya mvinyo akanywa kidogo .Alionekana kuzama katika mawazo ya ghafla na sura yake ilikuwa imebadilika.Akatoa sigara na kuiwasha akavuta.

" Kila nikikufikiria Jimmy ninajisikia vibaya sana.Ninakuchukia Jimmy.Ninakuchukia sana.." akawaza Linah huku akiupuliza moshi mwingi hewani.Baada ya kuvuta mikupuo kadhaa akaizima sigara yake na kuendelea kuandika.

" Siku ya kuondoka ikawadia na wazazi wakatupeleka hadi jijini Arusha ambako tungepanda basi la kuelekea shuleni kwetu ambalo huwasubiri wanafunzi pale Arusha.Tulilala Arusha na siku iliyofuata tukapanda basi letu la shule na kuanza safari ye kuelekea Nairobi.Hatukuwa wanafunzi wengi ndani ya basi.Hatukuzidi wanafunzi ishirini.Safari ilikuwa ni nzuri sana na tuliifurahia.Ilikuwa ni mara yangu ya kanza kusafiri umbali ule mrefu kwa basi.Nilimshukuru baba kwa kunikubalia nisafiri na basi na kuifurahia safari ile.

Baada ya mwendo wa masaa mawili basi letu likasimama baada ya kulikuta basi moja limeegeshwa pembeni ya bara bara likiwa limeharibika.Dereva wetu akashuka na kwenda kuongea na dereva wa lile basi ambalo lilikuwa limeharibika.Baada ya maongezi ya dakika kama ishirini hivi dereva wetu akarejea katika basi letu na kutuambia kwamba lile basi lililokuwa limeegeshwa pembeni ya bara bara ni basi lililokuwa limewabeba wanafunzi wa kitanzania wanaosoma nchini Kenya lakini katika shule tofauti na yetu na kutokana na hitilafu iliyojitokeza itawalazimu kulala pale njiani hadi kesho.Dereva wetu akatuomba kama tunaweza kukubali kuwasaidia wanafunzi wenzetu wapatao ishirini hadi jijini Nairobi ambako wangepatiwa usafiri mwingine wa kuelekea shuleni kwao.Wanafunzi wenzangu walikataa kata kata kwamba hawawezi kuchangamana na wanafunzi wa shule nyingine.Ni mimi pekee ambaye nilisimama na kuwashawishi wanafunzi wenzangu tukubali kuwasaidia wale wanafunzi wenzetu kwa sababu ni watanzania wenzetu na kama ilivyo jadi yetu watanzania ni kusaidiana.Wanafunzi wenzangu wakakubali tukawachukua wale wanafuzi na safari ya kuelekea Nairobi ikaendelea.Kijana mmoja kati ya wale tuliowapa msaada akaja kukaa katika kiti cha pembeni yangu ambacho hakikuwa na mtu.Nilikuwa nimeinama nikisoma kitabu changu cha hadithi kilichotungwa na Patrick C.K kiitwacho Back to Kigali.

" Mambo !....."akanisalimu kijana yule .Sauti yake ikanifanya niivue miwani yangu nikaishika mkononi na kugeuza shingo nikamungalia.

" Poa mambo vipi? Nikajikuta nikijibu

" Poa" akajibu kwa ufupi.

" Poleni na kuharibikiwa gari" nikasema

" Ahsante..tumekaa pale kwa zaidi ya masaa matano tukisubiri msaada.Kama na ninyi msingekubali kutusaidia basi tungelala hapa njiani kwa sababu tuliambiwa gari lingine toka Nairobi lingefika kesho asubuhi." akasema kijana yule ambaye alikuwa mweupe mrefu kidogo .Alikuwa amevaa koti lenye mchanganyiko wa rangi za bluu na nyeukundu na ndani yake alikuwa amevaa fulana nyeupe..Alionekana ni kijana mtanashati na mtaratibu sana.Sikumjali nikaendelea na kusoma kitabu changu

" Karibu juice" Nikastuliwa na sauti ya yule kaka akiwa na boksi la juice mkononi.Mawazo yangu yote yalikuwa katika kitabu nilichokuwa nikikisoma ambacho kilikuwa na simulizi iliyonitoa jasho.Huku nikitabasamu nikasema

" Ahsante sana lakini mimi huwa situmii kinywaji chochote safarini" Nikasema na kumfanya ashangae

" Kwa nini? Unaumwa? akauliza yule kaka

" hapana siumwi ni utaratibu wangu wa kutotumia kinywaji chochote safarini” Nikasema

" Kama hutumii kinywaji chukua basi hii keki" akasema tena yule kaka

" Nashukuru sana lakini tumbo langu haliko sawa sawa siku ya leo" nilimdanganya yule kaka ili asiendelee kunisemesha kwa sababu sehemu niliyokuwa nimefikia katika hadithi niliyokuwa naisoma ilikuwa inasisimua mno.Yule kaka ambaye kiumri alionekana ni mkubwa zaidi yangu ni kama aliyasoma mawazo yangu na akaniacha niendelee kukisoma kitabu changu.Simulizi ile iliniteka kabisa mawazo na kunifanya niwe kimya sana.Kuna sehemu ilikuwa na hisia kali sana nikashindwa kuvumilia machozi yakanitka.Nikavua miwani na kufuta machozi.

" macho yanauma? akauliza yule kaka ambaye alikuwa akiniangalia

" hapana siumwi macho ila kuna sehemu katika hadithi hii ninayoisoma imenifanya nitoe machozi" nikasema huku nikifuta machozi.

" Kinaitwaje kitabu unachokisoma?

" Kinaitwa Back to Kigali.." Nikasema.

" Inaonekana unapenda sana hadithi" akasema yule kaka

" Ndiyo...ninapenda sana kusoma hadithi" nikajbu.

" Mimi huwa si mpenzi sana wa kusoma vitabu.." akasema yule kijana

" Unapenda nini? nikauliza huku nikijinyoosha

" Ninapenda sana kuogelea na kucheza mpira wa kikapu...Unaonekana umechoka sana" akasema yule kijana

" Ninahisi nimechoka sana.Unajua ni mara yangu ya kwanza kusafiri kwa basi kwa hiyo nasikia uchovu mwingi" nikasema

" Ouh kumbe ni mara ya kwanza kusafiri kwa basi.Huwa unatumia usafiri gani kwenda shule? akauliza

" Huwa ninapanda ndege.Safari hii nilitaka kujaribu usafiri wa basi " nikasema

" Unauonaje usafiri wa basi? akauliza

" ni mzuri..' nikajibu kwa ufupi

" wewe unaishi Arusha? akauliza tena

" Ninaishi Dar es salaam..we unaishi wapi?

" Hata mimi ninaishi Dar es salaam lakini nina kaka yangu hapa Arusha" akasema

" Kumbe wote tunaishi Dar !..

" Naitwa Jimmy....Jimmy msomange.wewe waitwa nani?

" Naitwa Linah..." nikajibu

" Linah nani? akauliza

" Linah tu inatosha" nikajibu huku nikicheka..

safari iliendelea huku nikiendelea na maongezi na Jimmy ambaye alikuwa mcheshi sana na mkarimu.Aliniambia kwamba anasoma kidato cha tano katika shule moja iliyoko kaskazni mwa Nairobi..Alinifahamisha kwamba baba yake ni katibu mkuu wa wizara ya nishati na madini..Alikuwa mcheshi sana Jimmy na taratibu nikaanza kuvutiwa naye.Nilijikuta nikianza kumzoea na kupenda kumsikiliza.Alikuwa akiongea taratibu kwa vituo na kujiamini..alikuwa akicheka kwa ustaarabu na kwa vituo..kila alichokiongea nilijikuta nikikifurahia..Alikuwa ni kijana anayefikiri kwanza kabla hajaongea jambo..Niliyakumbuka maneno ya rafiki yangu Christine aliyowahi kunieleza kwamba hakuna sehemu maalum unayoweza kumpata mpenzi..Mpenzi unaweza ukampata sehemu yoyote ile iwe kanisani,hospitali au hata safarini..Nilianza kuingiwa na hisia za kwa nini Jimmy asiwe mpenzi wangu? Tayari nilikuwa nimevutika naye kwa kila kitu..Nilihisi furaha kuwa karibu naye.Niliomba tusifike Nairobi mapema ili niendelee kuwa karibu na Jimmy kijana mtanashati na mwenye sura nzuri ya kuvutia.

Tulilikaribia jijji la Nairobi na akina Jimmy walitakiwa kuteremka kwani ilikuwa ni kinyume cha maadili ya kazi kwa madereva wetu kupakia abiria ambao si wanafunzi wa shule yetu.Nilisikitika sana kuachana na Jimmy.Nilijitahidi kuongea na dereva wetu ili awaache hadi tufike jijini Nairobi lakini haikuwezekana.Jimmy akaniomba nimpe anuani yangu ya barua pepe na akaahidi atakuwa akiwasiliana nami kila siku..Tuliwaacha akina Jimmy pale njiani wakisubiri basi lingine lililokuwa njiani kuja kuwachukua.Nilihisi kupungukia kitu muhimu sana baada ya kuachana na Jimmy.Nilihisi kutaka kuendelea kuwa karibu naye na kuufurahia ucheshi na maongezi yake.Siwezi kuwaficha wasomaji kwamba tayari nilianza kumpenda Jimmy.Ilikuwa ni mara yangu ya kwanza kuvutiwa na mvulana namna ile.Sikuwahi kuwa na hisia za kupenda hapo kabla lakini baada ya kukutana na Jimmy nimejikuta nikianza kumpenda ghafla..Hii ndiyo ile inayoitwa Love at first sight yaani unamuona mtu mara ya kwanza na unatokea kumpenda kupindukia.Nilianza kumpenda Jimmy na moyoni niliamini tayari nimepata rafiki wa kiume.

Toka siku ile mawasiliano kati yetu yalikuwa makubwa na kila siku usiku niliutumia muda mwingi kuwasiliana naye kwa njia ya mtandao.Jimmy naye alionekana kuvutiwa sana na mimi na taratibu mahusiano ya kimapenzi yakaanza kujengeka kati yetu .Kwa kuwa baba hakuniruhusu tena kusafiri kwa basi tulipanga kukutana jijini dar wakati wa likizo.Na huu ukawa ni mwanzo wa furaha kubwa katika maisha yangu.Mimi na Jimmy tukawa wapenzi..Kilikuwa ni kipindi cha furaha sana katika maisha yangu.Nilitamani shule zisifunguliwe mapema ili niendelee kuwa na Jimmy kijana ambaye nilimpenda na kumkabdhi moyo wangu na kila kitu changu.Sikuwa na kauli mbele ya Jimmy nilikufa nikaoza mimi Linah..Nilipofushwa na raha alizonipa yule kijana,sikuona wala kusikia la mtu tena .Jimmy aliniingiza katika ulimwengu wa mapenzi ambao utamu wake nilikuwa nikiusikia au kuusoma katika simulizi mbali mbali lakini sasa nilikuwamo ndani yake nikiufurahia utamu huu nikiwa na mtu niliyempa jina lililotukuka la malaika nikiamini ndiye malaika wangu anayeishi .Nilikuwa nimekosea sana kumbe Jimmy alikuwa ni shetani mwenye mapembe na jicho moja na ambaye makaazi yake ni jehanamu..Nilikuwa nimejipeleka mwenyewe kwa kibaraka wa Lucifer yule shetani mkuu..Nilikuwa nimepotea njia...I hate you Jimmy....I hate you...I hate you..soooo much.." akasema Linah akaupeleka mkono wake machoni akayafuta machozi.Akanywa funda la mvinyo kisha akawasha sigara akavuta na kupuliza moshi mwingi hewani akaitazama bahari.

" Ngoja kwanza hasira zangu zipungue ndipo niendelee na kuandika simulizi yangu.Leo nataka nimalize kusimulia kuhusu mahala hapa na nini kilinitokea siku ile ya jumamosi.Sitaki kurudi tena mahala hapa kwani wakati mwingine pananifanya niwe na hasira sana kila ninapomkumbuka yule shetani Jimmy." akawaza Linah huku akipuliza moshi hewani.

MPENZI MSOMAJI TUKUTANE TENA SEHEMU IJAYO

TUNAWATAKIA WOTE SIKUU NJEMA YA PASAKA

ENDELEA