TEN CHAPTERS SEHEMU YA 22

RIWAYA : TEN CHAPTERS

SEHEMU YA 22

ILIPOISHIA SEHEMU ILIYOPITA

    Mara tu tulipofika nyumbani  tulikuta tayari kuna umati mkubwa wa watu. .Nje ya nyumba yetu kulikuwa na magari mengi hivyo Jimmy hakuweza kuliingiza gari lake ndani.Akalisimamisha nyuma ya magari mengine nikashuka.Nilishuka kwenye gari haraka haraka..nilionekana kama  vile nimechanganyikiwa.Akili yangu haikuwa ikifanya kazi sawa sawa.Nilitamani kulia lakini machozi hayakuwa yakitoka.Nikasikia vilio vya akina mama wakilia ndani ya nyumba.Miguu ikaanza kutetemeka nikajua mambo yako tofauti na ninavyofikiri.

watu waliokuwa wamesimama wakiwa na nyuso za mshangao walikuwa wananiangalia kwa huzuni kubwa.Ghafla nikahisi miguu imeshindwa kutembea nikataka kuanguka lakini nikawahiwa na wanaume wawili waliokuwa karibu yangu.Wakaninyanyua na kunipeleka ndani ambako nilikuta idadi kubwa ya akina mama.Waliponiona wakaanzisha vilio nikajua tayari katika ajali ile nimempoteza mzazi mmoja au wote...Nikiwa sina hata nguvu ya kuongea jambo akatokea Pamela ambaye alikuwa ameshikwa na akina mama watatu.Aliponiona tu naye akajitupa chini akaanza kulia kwa nguvu

  " Linah tumekwisha mdogo wangu....hatuna tena wazazi mdogo wangu...tutakwenda wapi sisi...." alilia kwa nguvu Pamela..nikaanguka na kupoteza fahamu tena.

ENDELEA.............................................

            Linah akachukua chupa yake ya mvinyo akanywa mafunda mawili na kuiweka chini.Akaitazama ile nyumba iliyoko mbele yake ambayo kwa sasa tunaweza kuiita ni gofu akachukua kitambaa na kujifuta machozi.

            " Binadamu.............!!!.." akawaza halafu akaiinamia kompyuta yake akapitia kile ambacho amekwisha kiandika .

            " Ngoja niendelee na simulizi yangu japokuwa ninaumia sana kila ninapolazimika kuikumbuka tena historia  ya maisha yangu ambayo nimekuwa nikijitahidi kuisahau." akawaza Linah kisha akaendelea kuandika simulizi yake.

            " Sikumbuki nilipoteza fahamu kwa muda gani lakini ninachokikumbuka ni kwamba nilifumbua macho na kujikuta katika chumba kimoja chenye ubaridi na ndani yake wakiwemo wakina mama kama watano hivi wote wakiwa na nyuso za huzuni.Nilimtambua mmoja wao alikuwa jirani yetu mama Salama aliyekuwa muaguzi katika hospitali moja ya binafsi.Akina mama wale walipogundua nimeamka wakashukuru Mungu.Mama Salama akanifuata pale kitandani nilikolala.Akanishika kichwa na kusema

            "Linah unajisikiaje? akauliza mama salama ambaye naye macho yake yalikuwa mekundu nikajua ni kwa sababu ya kulia.Mara moja kumbu kumbu zote zikanijia nikakumbuka sauti ya dada Pamela akiniambia kwamba wazazi wetu wote wamefariki dunia.Sikuweza kujibu kitu nilibaki nikimuangalia mama Salama  ambaye naye alikuwa ameinama akinitazama kwa huruma sana.Mwili wangu haukuwa na nguvu ya kufanya chochote zaidi ya kufumbua macho na kulia machozi.

            "Linah endelea kulala..naomba usiwaze kitu chochote kile..Pumzika mwanangu mambo haya ni ya kawaida." akasema mama Salama huku akinifuta machozi yaliyokuwa yakinichuruzika usoni.Maneno yale aliyoyasema mama Salama ni kama yaliamsha tena machungu yote nikapoteza fahamu tena.Sikumbuki nini kiliendelea lakini ninachokikumbuka ni kwamba nilifumbua tena macho na kujikuta safari hii nikiwa hospitali.Madaktari walikuwa wamenizunguka.Kumbu kumbu zangu zikarudi kwa kasi nikakumbuka kwamba nilikuwa nimepoteza fahamu kwa muda mrefu.Daktari mmoja mfupi mweusi akanipima na kisha akawageukia wale wenzake wakashauriana  jambo halafu akanirudia pale nilipokuwa nimelala.

            " Linah ..Linah..unanisikia? akauliza yule daktari.Nilikuwa ninamsikia lakini nguvu za kumjibu sikuwa nazo.Mwili wangu ulikuwa dhaifu sana.

            " Linah ..unanisikia? akauliza tena lakini nikabaki nikimuangalia tu bila kujibu chochote.Nilitamani kutoa sauti lakini haikuwa ikitoka.Akashauriana na wenzake na kisha nikamuona akifungua mlango akatoka na kuanza kuongea na watu fulani ambao nilipotazama vizuri niliona ni kundi la akina mama wakiwa wamesimama karibu na mlango .Kundi lile la akina mama likanikumbusha kila kitu kilichokuwa kimetokea nyumbani .Nilikumbuka kwamba wazazi wangu wote wawili walikuwa wamefariki dunia.Nilitamani kuangua kilio kwa uchungu niliokuwa nao lakini sikuwa na nguvu za kufanya hivyo.Sikuwahi kusikia uchungu wa kufiwa na mtu umpendaye hadi siku hii. Nilisikia uchungu mkubwa sana kiasi kwamba nikashindwa kulia kwa nguvu nikabaki nikilia kimya kimya.Machozi yalikuwa yakiniporomoka lakini sikuweza kutoa sauti.Pale mlangoni nikamuona daktari akiingia akiwa ameongozana na mama salama ambaye akaja moja kwa moja pale kitandani.Nilimtazama machoni alikuwa akitokwa na machozi aliponiona hali niliyokuwa nayo pale kitandani.

            " Linah mwanangu pole sana..Usiwaze kitu mwanangu ..Mungu atakusaidia na utakipita kipindi hiki kigumu..Jipe moyo mwanangu sisi sote tuko pamoja nawe..Haya ni mambo ya kawaida ambayo huwa yanamtokea kila mtu.Tafadhali kuwa jasiri kwa ajili ya wadogo zako" akasema mama Salama.Maneno yake yalikuwa machache lakini mazito sana na kwa kiasi kikubwa yakanipa moyo.Bado nayakumbuka mpaka leo maneno yale.Nilimuelewa alichokisema mama salama lakini sikuweza kumjibu kwa sababu sikuwa na nguvu za kuongea.Nilifumba macho na sikutaka tena kuonana na mama Salama kwa sababu nilisikia uchungu mkubwa mno.Nilitaka kuwa peke yangu kwa wakati ule.Mama salama akanishika usoni na kusema

            " Linah mwanangu leo utalala hapa hospitali madakatari wanasema hali yako si nzuri .wanataka waendelee kukuangalia hali yako kwa usiku huu halafu kesho wanaweza wakakuruhusu urejee nyumbani.Linah najua uko katika kipindi kigumu sana lakini jipe moyo mwanangu.Kaza moyo na simama imara ili uweze kuwapa nguvu wadogo zako.Mimi nitakuwa hapo nje ya chumba hiki nitalala nawe hapa hapa hospitali,.Muda wowote ukinihitaji nitakuwa hapo nje." akasema mama Salama na ingawa sikuwa nikimuangalia usoni kwa sababu macho yangu niliyafumba lakini niliweza kuisikia sauti yake alikuwa akilia.Baada ya mama Salama kutoka mle chumbani daktari akaingia na kunitundikia chupa ya maji halafu akachoma sindano katika chupa ile.

            " Mpaka saa tano za usiku tayari chupa hii itakuwa imekwisha na atakuwa amepata nguvu.Mwili wake uko dhaifu sana.Namuonea huruma sana huyu binti amekutana na masahibu makubwa namna hii katika umri mdogo.Anahitaji msaada wa kitaalamu ili akili yake iweze kuwa sawa.Ngoja kwanza tumuangalie kwa usiku huu atakuwa katika hali gani halafu tutaangalia nini cha kufanya siku ya kesho" akasema daktari akimwambia muuguzi  aliyekuwa pembeni yake.

            Chupa ile ya maji ikaanza kushuka taratibu kuingia mwilini mwangu.Daktari yule akatoa maelekezo fulani kwa muuguzi halafu yeye akaondoka zake.Nikabaki chumbani mimi na yule nesi ambaye aliendelea na shughuli zake nyingine za usafi halafu naye akafungua mlango akatoka nikabaki peke yangu.Nilibaki mimi na dunia yangu.Hapo ndipo mawazo na kilio cha kimya kimya vikaanza upya.Nilikuwa nimafumba macho na picha za wazazi wangu wakiingia katika gari asubuhi ya siku ile ikanijia .Walikuwa wakitabasamu na kucheka kwa furaha.Nikakumbuka ni mimi ndiye niliyemfungulia mama mlango wa gari akaingia halafu  nikaufunga.Nikakumbuka nilitaniana na baba kabla hawajaondoka.Baba alinitania kwamba sasa wameniachia uwanja wangu wa kutawala.Nadhani baba alifahamu fika kwamba tayari nilikuwa na mpenzi na ndiyo maana alinitania akiniambia kwamba uwanja ni wangu.Sikujua kama ile ndiyo ilikuwa ni kauli ya mwisho ya baba.Nilitaniana na wazazi wangu asubuhi ile bila kujua kama tulikuwa tukiagana.Machozi yakaendela kunitiririka.Nililia sana usiku ule japokuwa sikuwa nikitoa sauti.Bado ilikuwa vigumu kuamini kama wazazi wangu niliowapenda sana wamefariki dunia na kuniacha mimi na wadogo zangu wawili.Sikutaka kuamini mapema kama ilikuwa ni kweli.Nilijilazimisha kuamini kwamba ilikuwa ni ndoto tu"

            Linah akasimama kuandika ,akachukua sigara akaiwasha akavuta na kupuliza moshi mwingi hewani,macho akiwa ameyaelekeza katika gofu lililoko mbele yake.Ni katika gofu hili ndiko Linah na familia yake yote waliishi na kwa sasa haikuonekana kama ni nyumba iliyokuwa na thamani kubwa pale mtaani.Imebaki ni kama gofu la kale.Kisha maliza ile sigara aliyokuwa akaiivuta akachukua chupa yake ya mvinyo akanywa funda kadhaa halafu akautazama mvinyo ule akatabasamu na kuirudisha chupa chini.

            " Naona kama kuendelea kukaa hapa na kuiona nyumba yetu kunanizidishia machungu mengi..nahisi kama kidonda ambacho kimekwisha anza kupona kimetoneshwa upya .Historia ya nyuma ambayo nimekuwa nikijtahidi kuisahau imeanza kujirudia kwa kasi kubwa.lakini pamoja na hayo lazima niendelee na kuiandika simulizi yangu." akawaza Linah akataka kuinamia kompyuta yake kuendelea kuandika lakini akajikuta akigeuza kichwa chake baada ya kugundua kwamba kuna mtu amesimama nyuma yake.Akageuza shingo yake na kumkuta jamaa mmoja mnene amesimama akimtazama.

            " Habari yako kaka" akasema Linah.

            " habari yako dada yangu.." akasema yule jamaa na kupiga hatua mbili kumsogela Linah

            " Nikusaidie nini kaka yangu? akauliza Linah kwa sauti ya  upole.

             " Nimekuona muda mrefu umekaa hapa peke yako nikajiuliza huyu mwanadada mrembo anafanya nini maeneo haya peke yake?Samahani kama nimekusumbua sikujua kama uko na kazi zako" akasema yule jamaa ambaye alionekana  tayari amelewa.

            " Usijali kaka yangu..Nina kazi zangu ninafanya na ndiyo maana nimeamua kujitenga huku mbali na kelele za watu ili niweze kufanya kazi yangu kwa uhuru"akasema Linah

            "By the way naitwa Henry" akasema yule jamaa huku akimpa Linah mkono. 

            " Naitwa Linah  " akajibu Linah kwa ufupi halafu yule jamaa akaondoka zake akarejea katika baa.

            " watu wengine bwana..hawawezi kumuona mtu ametulia mwenyewe akituliza akili yake lazima wamfuatilia na kujua anafanya nini.." akasema Linah kisha akaendelea kuandika simulizi.

            " Sikumbuki nililala saa ngapi lakini ninachokikumbuka ni kwamba nilifumbua macho baada ya kusikia sauti za watu wakiongea.Nilihisi kama vile niko ndotoni lakini kumbe sikuwa nikiota bali ilikuwa ni kweli.Nilifumbua macho na kujikuta bado nikiwa katika chumba cha hospitali.Madaktari wawili walikuwa wakiongea kuhusiana na hali yangu.Waliponiona nimefumbua macho mmoja wao akanisogelea.

ENDELEA KUFUATILIA SIMULIZI HII KILA SIKU