SERENA SEHEMU YA 16

RIWAYA : SERENA

SEHEMU YA 16

ILIPOISHIA SEHEMU ILIYOPITA

“Kwa hiyo kama operesheni hiyo itakuwa ijumaa usiku basi toka sasa inabidi tuanze kufanya maandalizi kwa ajili hiyo.Kila kitu kinatakiwa kiwe tayari mpaka kesho jioni.Mimi ngoja nikawapigie wakurugenzi niwataarifu kuwa tutaifanya operesheni hiyo Ijumaa usiku.Orodhesha pia vifaa vyote ambavyo unavihitaji katika operesheni hii ili vitafutwe haraka sana kabla ya siku ya kesho .”

 Akasema Dr Henry huku akiondoka ofisini kwa Dr Jason na kuelekea ofisini kwake  akiwa mwingi wa furaha.Akaingia ofisini kwake akaufunga mlango wake na kutoa simu yake ya mkononi halafu akazitafuta namba za Mr Kumzaya.

            “Hallow Mr Kumzaya”

            “Hello old boy,how are you ?”

            “I’m fine Mr Kumzaya.Sasa ni hivi mambo yanakwena vizuri sana.Kila kitu kiko sawa sasa hebu tukutane ili tupeane mikakati nini cha kufanya ikiwa ni pamoja na makabidhiano ya kila kitu kama tulivyokuwa tumekubaliana”

            “Ok Dr Henry kazi nzuri sana.Kwa sasa naelekea ofisini kwangu tukutane pale ndani ya dakika ishirini”

            “Ok Kumzaya utanikuta pale ofisini kwako nakusubiri”

            “ Dr Henry Good work,hahahahaaa !!” Akajibu Mr Kumzaya huku akicheka halafu akakata simu

            Dr Henry akavaa koti lake la suti ,akafunga ofisi yake na kutoka kwa haraka.

            “ Siamini kama nusu saa ijayo nitakuwa naitwa billionea.hahahaahaa !! bahati ilioje.” Akawaza Dr Henry huku akicheka na kuliacha geti la hospitali.

ENDELEA………………………………….

            Baada ya Dr henry kutoka mle ofisini Dr Jason akachukua simu na kujaribu kumpigia Stella.Simu ikaita bila kupokelewa.Akapiga tena mambo yakawa yale yale.Akaiweka simu mezani.

            “Stella mekasirika sana.lakini hata hivyo ni kwa nini aweke watu wa kunifuatilia na kunichunguza? Anadai ni kwa ajili ya kunilinda.Labda alisikia kuhusu kifo cha Dr Selemani ,lakini hata hivyo kwa nini hakunishirikisha ili na mimi nitoe maoni yangu?Hana lolote Stella ni wivu tu unamsumbua.Ana wivu sana .Hata hili la kunitaka niachane na operesheni ya mzee Albano ni kwa ajili ya kumkomoa Serena.Ndio maana ameamua kutunga safari ya dharura kwa sababu anajua siwezi mkatalia kitu chochote.Sorry Stella not this time.Kwa sasa nina majukumu mazito mno.Najua vile vile  itaibuka vita kubwa kati ya Stella na Serena.Nitamlinda Serena kwa gharama yoyote ile.”  Akawaza Dr Jason

            “Ninatakiwa kuwa makini sana katika kila kitu ninachokifanya .Najua Stella ataendelea kunichunguza kila ninachofanya na hasa kwa sasa ambapo kuna mtafaruku kati yangu naye kuhusu Serena”

            Dr Jason akavuta pumzi ndefu ,akaangalia saa yake iliyoonyesha mida hiyo ilipata saa tano na dakika kumi na saba.Akaichukua simu yake na kumpigia Philip

            “Hallow Phillip “Akasema Dr Jason baaada ya Philip kupokea simu

            “Hallow Jason.How are you brother.Kaka hongera sana kwa kile kifaa cha jana.Hivi yule ni binadamu wa kawaida au ni jini yule.Uzuri wake unatia shaka sana,si uzuri wa kawaida.” Akasema Philip. Dr Jason akacheka kicheko kikubwa halafu akasema

            “Yule ni binadamu wa kawaida Phillip”

            “Mmmhhh!! kaka basi we mkali maana kuibua kifaa kama kile si mchezo”

            “Ok Phills tuachane na hayo.Nina shida kubwa leo nahitaji msaada wako.”

            “Una shida gani Jason.You sound so down”

            “Phills nahitaji gari zako mbili nina kazi nazo leo.Nataka ile Toyota mark II pamoja na ile Rav 4.Nataka umtume dereva yeyote aende na ile Mark II hadi pale Blue sky shopping mall.Akifika pale aipaki katika  maegesho ya kule nyuma.Funguo aziweke chini ya zuria upande wa kushoto.Ile Rav 4 ipelekwe Chittah green view hotel.Nako vile vile aipaki kwa ule upande wa chini pembeni na funguo yake aiweke pia chini ya zuria.”

            “Dr Jason una matatizo gani leo? Una wageni? Phillip akauliza

            “Phillip nina mambo mengi sana siku ya leo tutaongea baadae.tafadhali ninaomba zoezi hilo liende haraka kidogo halafu unitaarifu likiwa tayari.”

            “Ok Dr Jason nawatuma vijana wangu saa hivi wanaifanya kazi hiyo halafu nitakutaarifu baada ya muda mfupi.Ila unaniogopesha…”

            “Usiogope Phillip nina shughuli muhimu sana siku ya leo.”Akajibu Dr jason na kukata simu.Akatoka mle ofisini na kuelekea katika chumba ambacho alitaka kitumike kwa ajili ya operesheni ya mzee Albano.Hospitali hii ina vyumba vinne vya upasuaji mkubwa.Baada ya kuvikagua vyote Dr Jason akaamua kukitumia chumba kilichopewa jina kama 2c badala ya chumba kilichoitwa FT ambacho ndicho kilichozoeleka katika operesheni kubwa.Akatoa maelekezo kwa madkatari kuwa wafanye maandalizi katika chumba kile cha 2c badala ya FT.

 

*                      *                      *                      *

            Dr Henry akiwa ni mwenye sura iliyojaa tabasamu kubwa ,alikuwa akizunguka zunguka ndani ya ofisi hii kubwa ya Mr Kumzaya ofisi iliyopambwa kwa thamani za gharama kubwa.Furaha aliyokuwa nayo ilikuwa haielezeki.Simu yake ya mkononi ikaita haraka haraka akaangalia na kukuta ni Dr Jason.

            “hallow Dr Jason”

            “Dr Henry nimefanya mabadiliko kidogo.Tutatumia chumba 2c badala ya FT.Kwa upasuaji mkubwa kama huu wa mzee albano  inatubidi tutumie chumba hiki”

            “Ok Dr Jason mimi niko nje ya ofisi kidogo nitarejea baadae.Umeshatoa maelekezo ya kuanza kufanyiwa maandalizi?

            “Ndiyo Dr henry maandalizi tayari yamekwisha anza kufanywa.Kinachofanyika hapa ni uhakiki tu kama kila kitu kipo sawa ila itatubidi tufunge drill mpya  pamoja na CT ya pili.Vile vile tutahamisha Endoscope ya FT ambayo tutaitumia katika operesheni hii.”

            “hakuna tatizo Dr Jason.Kuna kitu kingine kinachotakiwa ? Akauliza Dr henry

            “Hapana Dr henry.Kama kuna kitu kinakosekana.nitakutaarifu”

            Dr henry akazidi kutabasamu baada ya simu ile ya Dr Jason.Muda huo huo Mr Kumzaya akaingia.

            “Hellow old boy” akasalimu Mr Kumzaya kwa furaha kubwa

            “Hello Kumzaya.How are you?

            “I’m ok Dr Henry.Samahani kwa kuchelewa.Foleni  ni kubwa sana leo”

            “hakuna tatizo Mr Kumzaya.Hata hivyo si muda mrefu sana toka nimefika.You have a very nice office”

            “karibu sana” Akasema Mr Kumzaya na kumkaribisha Dr Henry sofani.Akafungua friji na kumimina kinywaji kikali katika glasi mbili moja akampatia Dr Henry halafu naye akaketi sofani akimuelekea Dr Henry

            “Ndiyo Dr.Henry Nipe habari njema”

            “Habari ni nzuri sana Mr Kumzaya.Kila kitu kinakwenda vizuri.Nimetoka kuongea na Dr Jason asubuhi hii na tumepanga operesheni ifanyike siku ya ijumaa wiki hii.Hata dakika mbili zilizopita nilikuwa naongea naye, yuko katika maandalizi.Kwa hiyo uhakika ndio huo operesheni itafanyika siku hiyo ya Ijumaa.Sasa sijui huyo kijana wako yuko tayari? Na ni daktari wa kweli mwenye taaluma na anayejua nini anatakiwa kufanya?

            Mr Kumzaya akanywa funda kubwa akakohoa kidogo halafu akasema

            “Dr henry kazi nzuri sana umeifanya.Nasikitika sana kwa kutokufahamisha mapema kuhusu suala hili nadhani kwa sasa tungekuwa tumeshalimaliza muda mrefu mno.Kuhusu yule daktari wetu, yupo tayari .Ni daktari mzoefu sana katika dawa za usingizi.Anachosubiri ni simu yangu tu ili aweze kufika hapa mara moja.Nitampigia simu sasa hivi ili kesho asubuhi awasili manake anatokea nje ya nchi.Akisha wasili haraka sana mimi nitamkabidhi kwako.Usiwe na wasi wasi kabisa kuhusu hilo”

            “Usijali Mr Kumzaya kama yuko tayari na unamwamini basi hakuna tatizo elewa kazi imekwisha kinachobakia ni mimi kumjumuisha kwenye timu.Natumai Kazi yako nimeshaifanya kikamilifu sasa sijui utaratibu wa makabidhiano ya ujira wangu unakuaje?

            Mr Kumzaya akatabasasamu halafu akasema

            “Dr Henry wewe ni zaidi ya ndugu yangu kwa jambo hili ulilonisaidia.Napenda nikuhakikishie kuwa kila kitu kitakwenda kama kilivyopangwa.Kila tulichokuahidi kukupatia kwa kutufanyia kazi hii tutakupatia na hata zaidi kama ikionekana unahitaji zaidi.Tukitoka hapa nitakupeleka ukalione gari jipya kabisa tulilokuahidi kukupa pamoja na nyumba ili uwe na uhakika wa ninachokisema.Lakini napenda kukutaaridu kuwa sintaweza kukukabidhi kwa leo  hadi pale nitakapohakikisha kijana wetu yuko katika chumba cha upasuaji.Nadhani hayo ndiyo yalikuwa makubaliano.Ondoa shaka kwamba unaweza ukatufanyia kazi halafu tukakugeuka na tusikupe tulichokuahidi.Sisi hatuko hivyo Dr Henry.Sisi ni watu tunaojiamini,kama pesa tunayo ya kutosha.Halafu kwa taarifa yako Dr henry wewe ni hazina yetu kubwa .Hatuwezi kukupoteza.Huu ni mwanzo wako tu wa mafanikio.Siku za mbele utafurahi kujiunga nasi.Hautaujutia uamuzi wako.”

            Dr Henry akalegeza tai yake,akatoa kitambaa mfukoni na kufuta kijasho kilichoanza kumtiririka.

            “Mr Kumzaya si kwamba sikuamini.Nakuamini sana ndugu yangu.Kama huo ndio uamuzi wenu basi vizuri.Mimi sina tatizo nitamsubiri huyo daktari wenu aje nimuweke katika timu halafu ataifanya kazi yenu na ninyi mnikabidhi changu”

            “hayo ndiyo maneno Dr Henry.Basi tusipoteze muda twende tuongozane ukahakiki mali tulizokuahidi”

            Wakatoka mle ofisini wakapanda gari la Mr Kumzaya wakaondoka .

*                      *                      *                      *

            Simu ya Philip kumtaarifu kuwa magari aliyoyahitaji tayari yamekwisha pelekwa sehemu husika ndiyo iliyomtoa Dr Jason pale hospitalini.Alipoingia bara bara kuu simu yake ikaita kuangalia alikuwa ni  Dr Anneth wanjiku

            “hallo Dr Anneth” akasema Dr Jason

            “Dr Jason habari yako.Mimi na Dr Edson tumewasili sasa hivi hapa uwanja wa ndege.Uko wapi?”

            “ouh Ahsante sana Dr Anneth naombeni  mnisubirini hapo hapo niko njiani nakuja”

            Dr Jason akapumua kwa nguvu

            “Kazi imeanza” Akasema na kuongeza mwendo wa gari .

            Blue sky shopping mall ni sehemu yenye pilika nyingi .Watu huwa ni wengi mno na hata magari hufurika kila siku.Dr Jason aliendesha gari lake kwa tahadhari kubwa ili ajaribu kuangalia kama anaweza kuwabaini vijana wanaomfuatilia lakini hakuweza kutokana na kuwepo kwa idadi kubwa ya magari barabarani.Alipofika Blue sky shoping mall  Dr Jason akaenda kuegesha gari katika maegesho ya mbele kabisa.Akashuka na kuingia ndani.Alipoingia tu ndani kwa haraka haraka akapanda juu halafu akashuka kwa ngazi iliyokuwa upande wa pili na kutokea mlango wa nyuma kwa kasi ya ajabu akaenda katika maegesho ya nyuma.Hakupata taabu kulitambua gari la Philip aina ya Toyota mark II kwani ameshalitumia mara nyingi.akaingia ndani,akainua zuria mkono wa kushoto na kutoa funguo.Akawasha gari na kuondoka.akatabasamu huku akiingia barabarani.

            “kama kuna anayenifuatilia atakaa pale hadi jioni” Akasema kwa sauti ndogo.

            Mwendo wa dakika kumi akawasili Chittah green view.Akapaki gari maegesho ya kwanza na kwa kasi akashuka akaingia hotelini akiwa kana kwamba anakwenda maliwato kabla hajafika akakunja kulia kama anaeleka jikoni lakini hakufika jikoni akakata kushoto na kulifuata korido hadi katika mlango wa kutokea kwa nyuma.Dr Jason anapafahamu vizuri mahala hapa amekuwa akija mara nyingi.Akatokea mlango wa nyuma na kwenda katika maegesho ya pembeni.Dakika moja tu akawa amelipata gari lililowekwa na kijana wa Philip aina ya Rav 4 akaingia akawasha na kuondoka kwa kasi kuelekea uwanja wa ndege.

            Ilimchukua dakika kama ishirini hivi kuwasili uwanja wa ndege.Alipoegesha gari , moja kwa moja akaelekea sehemu ya kusubiria wageni.Akaangaza angaza na mara akapatwa na furaha ya ajabu baada ya kugonganisha macho na Dr anneth.Akawaendea mahala walipokuwa wamekaa na kuwasalimu kwa furaha kubwa.

            “Karibuni sana Dar es salaam” Dr Jason akawakaribisha Dr Anneth na Dr Edson.

            Baada ya vicheko viwili vitatu Dr Jason akabeba mabegi yao na kuwaongoza kuelekea mahala alikoegesha gari lake wakaingia na kuondoka uwanjani hapo huku akiwa hana wasiwasi kuhusu kufuatiliwa.

            “Imekuwa kitambo sana toka tuonane mara ya mwisho katika kongamano pale Nairobi” Akaanzisha mazungumzo Dr Jason.

            “Yah imekuwa long time sana.Hata hivyo tumefurahi kwa mwito wako na tukaona tukuje mapema ili kufanya maandalizi na  kuona vile tutafanya operesheni hiyo” Akasema Dr Anneth ambaye kikawaida ni muongeaji sana.

            “Hata mimi nilikuwa nina mpango wa kuja Dar kuja spend one week.Unajua napenda manzi za Dar vile ziko charming.Unajua manzi za Kenya zinapenda tu chapaa lakini bibi za Dar zinajua kupati.After operesheni nataka nikapati na mrembo moja hivi….”akasema Dr Edson ambaye kiumri hajapishana sana na Dr Jason.Wote watatu mle ndani ya gari wakaangua vicheko kwa kauli ile ya Edson.

            “Usijali Edson kama unataka kupati basi hapa ndio umefika.Tukisha maliza operesheni hii basi utafurahi mwenyewe.”Akasema Dr jason

            Mwendo wa kama dakika arobaini hivi gari ile aina ya Toyota Rav 4 ikasimama nje ya jengo moja lililozungushiwa ukuta mkubwa .Honi ikapigwa na geti likafunguliwa haraka.Gari ikaingia ndani.Dr Jason na wageni wake wakashuka.

            “karibuni sana jamani.Mjisikie nyumbani” Akasema Dr Jason.

            “Ahsante sana “ Wakajibu kwa pamoja Dr anneth na Edson.

Hili lilikuwa ni jumba la siri la Dr Jason ambalo amelijenga bila kumfahamisha Stella ,akiwa na lengo la kufungua hospitali yake binafsi ya magonjwa ya fahamu.Tayari ndani ya jumba hili kuna vifaa karibu vyote vinavyohitajika katika matibabu ya magonjwa ya fahamu ikiwa ni pamoja na vifaa vya upasuaji mkubwa wa ubongo na uti wa mgongo.Amewahi kufanya operesheni mbili kwa siri kwa wagonjwa ambao hawakuwa na uwezo wa kulipia gharama hizo katika hospitali kuu ya magonjwa ya fahamu na zote zilifanyika kwa mafanikio makubwa.

            Baada ya kupata chakula cha mchana kilichoandaliwa vizuri na msichana wa kazi anayeishi katika jumba hili pamoja na kijana mwingine wa kiume ambao kwa pamoja ndio wamekuwa wakiliangalia jumba hili,Dr Jason akawaelekeza Dr Aneth na Dr Edson Vyumba vyao kwa ajili ya mapumziko mafupi kabla ya kuwafahamisha nini kilichokuwa kinaendelea hapo baadae.

*                      *                      *                      *

            Saa kumi na mbili jioni meza kubwa iliyokuwa katika chumba kidogo kilichoonekana kama ni chumba cha mikutano ilikuwa imezungukwa na watu.Tayari wageni wote wa Dr jason walikwisha wasili.Dr Ike toka Nigeria ndiye aliyekuwa mgeni wa mwisho kuwasili.

            “Ndugu zangu, kwanza kabisa napenda nichukue nafasi hii kuwashukuru nyote kwa moyo wenu wa upendo na kukubali kwenu kuja kuniunga mkono katika wakati huu mgumu.Rafiki wa kweli ni yule akufaaye wakati wa dhiki.Ninyi ndio marafiki wa kweli.Nimewaiteni wakati nina matatizo na nyote mmeacha kazi zenu na kuitika mwito wangu.Nasema karibuni sana na mjisikie nyumbani” Alifungua kikao Dr Jason

            “Ni siku kadhaa zilizopita hospitali yetu ilipokea mgonjwa mmoja akitokea India alikokuwa akitibiwa.Mgonjwa huyu ni mmoja kati ya watu maarufu sana hapa nchini na afrika mashariki.Anaitwa mzee Albano Mwakatala.Historia ya ugonjwa wake inaonyesha kwamba alipatwa na ajali ya gari na toka wakati huo akapoteza fahamu.Alipelekwa kwa matibabu nchini India lakini kwa mujibu wa madaktari kule India wanasema kwamba wasingeweza kumfanyia  upasuaji mzee huyu kwa sababu kwa namna ugonjwa wake ulivyo ni lazima angekufa tu hivyo wakaishauri familia yake kumrudisha nyumbani na kusubiri kifo chake.Baada ya kurejeshwa nyumbani na kuletwa pale hospitalini kwetu niliingiwa na wazo la kuzipitia taarifa zote za kitabibu toka katika hospitali aliyokwenda kutibiwa.Baada ya kupitia taarifa zile nikafanya vipimo na kugundua kuwa ugonjwa wa mzee huyu unaweza kutibika iwapo atafanyiwa upasuaji mkubwa na kuondoa hitilafu hiyo ndani ya ubongo wake.Mimi na madaktari wenzangu tukaonana na familia yake na kuwaeleza kwa kirefu taarifa za uchunguzi wetu nao wakaridhia kuwa tumfanyie operesheni mzee wao.” Dr Jason akanyamaza kidogo akameza mate halafu akaendelea

            “Wakati taratibu zikiendelea za kumfanyia upasuaji ,jana jioni likatokea tukio la kustusha sana .Mtu mmoja aliingia katika chumba cha mgonjwa na kuchoma sindano ya sumu katika chupa ya maji aliyokuwa ametundikiwa mzee Albano.Bahati nzuri daktari aliyekuwa zamu aliwahi kugundua hilo na kunipigia simu nikamuelekeza nini cha kufanya na kwa juhudi zangu na madakatari wenzangu tukafanikiwa kuokoa maisha ya mgonjwa huyu.Kilichonistua zaidi ni taarifa za kipolisi zilizomuhusisha daktari kutoka hapo hapo hospitalini kuhusika na kitendo hicho.Daktari huyo alikutwa amekufa katika ajali ya gari muda mfupi baada ya kudhaniwa kuwa alitenda kosa hilo.Kwa kweli taarifa hizo zilinipa woga mkubwa na kunifanya kutomwamini mtu yeyote wa pale hospitalini kwetu kwa sababu daktari huyu anayeshukiwa kuhusika na kitendo kile alikuwa ni mmoja kati ya madaktari wa kutumainiwa sana .Mpaka sasa hivi uchunguzi unaendelea kubaini ni nani wanahusika na tukio lile na nini kusudio la kufanya vile.Ndugu zanguni sipendi kuwaficha kuwa mzee huyu ni mtu muhimu mno kwangu na siwezi kukubali mzee huyu auawe.Mzee huyu ugonjwa wake unatibika na nimekwishaiahidi familia yake kuwa nitafanya kila niwezalo kuhakikisha kuwa baba yao anapona.Ni kwa sababu hiyo ndiyo maana nimewaita ninyi wenzangu ninaowaamini mno ili muweze kushirikiana nami katika operesheni hii.Nina imani kuwa pamoja na uchache wetu huu tunaweza kabisa kuifanya operesheni hii na tukafanikiwa .Baada ya kufanya operesheni hii, mgonjwa nitakuhamishia hapa na nitamuhudumia hadi atakapopona.Nyumba hii hakuna anayeifahamu kama ni yangu na kwa taarifa yenu ni kwamba nyumba tayari nimekwisha ifanyia maandalizi ya kutosha ya kuifanya hospitali ya magonjwa ya fahamu na nimewahi kufanya operesheni kama mbili hivi kwa siri na zote zimefanikiwa.Kwa taarifa tu ni kwamba operesheni hii itafanyika kesho.Usiku wa leo mtapumzika hapa na kesho tutaingia kazini.”

TUKUTANE TENA SEHEMU IJAYO……………………

KWA SIMULIZI ZAIDI TEMBELEA HAPA MASIMULIZI