TEN CHAPTERS SEHEMU YA 15

RIWAYA : TEN CHAPTERS

SEHEMU YA 15

ILIPOISHIA SEHEMU ILIYOPITA

 “ Nimefurahishwa sana na maendeleo mazuri ya wadogo zangu.Kila mmoja anajitegemea kwa sasa na wote wana mafanikio ya kutia moyo.Ni wakati wangu sasa na mimi kuitafuta furaha ya maisha yangu ambayo nimekuwa nikijharibu kuitafuta kwa miaka mingi bila mafanikio.

Kabla ya kufanya jambo ambalo nimedhamiria kulifanya nataka kwanza niandike kitabu cha historia ya maisha yangu ambacho kitakuwa na sura kumi kulingana na maisha yangu niliyoyapitia ambayo ninaweza kuyagawanya katika vipindi kumi na sura ya kumi ni hii ya maisha yangu ya Arusha kitabu ambacho nitakiita Ten  chapters.Katika kitabu hiki nitaeleza ukweli wote bila kuficha,mimi ni nani ,nimepitia mambo gani hadi hapa nilipofika.Kuna mambo mengi ambayo watu hawayafahamu kuhusu mimi.Nataka kupitia kitabu hicho wayafahamu.Wadogo zangu nao pia kuna mambo mengi sana ambayo hawayajui kuhusiana na mimi na sina ujasiri wa kuwaeleza kwa mdomo.Watasoma kupitia kitabu hiki na wakati wakisoma kitabu hiki sintakuwa katika upeo wa macho yao  kwani baada tu ya kumaliza kuiandika kitabu change nitapotea kama kimbunga.Najua wataumizwa sana lakini sina namna nyingine ya kufanya.Hii ndiyo njia pekee ya kuweza kuyamaliza maisha haya ya mateso na maumivu.” Alipowaza kuhusu hilo mara sura ya Genes ikamjia kichwani

      “ Sijui genes atakuwa katika hali gani muda huu.Sijui atakuwa katika maumivu gani Yule kijana.Nimemuumiza sana.Nimeuvunja moyo wake ..Najuta hata kwa nini lilifahamiana naye na nikajikuta nikimpenda.Genes atanisamehe sana kwa yote yaliyotokea lakini jambo hili limeniumiza mno na ndiyo maana ninataka kuyafikisha mwisho maisha haya ya kuumia moyo na kuumiza wengine.” Akawaza Naomi halafu akanywa mvinyo kidogo

      “ Sura ya kumi ya maisha yangu inaishia hapa.Ninalivua tena jina la Naomi na kurudia jina langu halisi  na kurejea maisha yangu ya kawaida tofauti na maisha ya maigizo niliyokuwa nikiishi Arusha.Sura hii imeniumiza mno kuliko sura zote” akawaza Naomi  na taratibu usingizi ukaanza kumnyemelea akajikuta amelala

ENDELEA………………………………………………….    

            Saa kumi za jioni gari ndogo aina ya BMW rangi nyeusi iliyokuwa katika mwendo wa taratibu inawasha taa ya kushoto kuashiria kwamba ilikuwa ikiingia Beach paradise hotel moja kati ya hoteli kubwa na ya kisasa sana jijini Dar es salaam.Taratibu gari ile nyeusi ikaelekea hadi katika sehemu ya maegesho ambako alikuwepo mtu maalum aliyeyaongoza magari ili yaweze kuegeshwa katika utaratibu mzuri.Dakika kama mbili hivi toka gari lile liegeshwe mlango wa upande wa dereva ukafunguliwa na msichana mmoja mrembo kupindukia akashuka taratibu.Msichana huyu ambaye alikuwa amevaa kaptura fupi nyeupe na fulana ndogo iliyofunika matiti yake machanga na kuiacha sehemu yote ya tumbo lake ikiwa wazi akafungua mlango wa nyuma na kutoa kompyuta ndogo ya mkononi na chupa mbili,moja ikiwa ni ya maji ya kunywa na nyingine ilikuwa ni chupa ya mvinyo.Kwa muonekano wake ulivyo pamoja na umbo lake haikuwa rahisi kukubali kwamba msichana yule mrembo alikuwa akitumia mvinyo ule aliokuwa ameushika.Taratibu akatoa mkoba na kuiweka ile kompyuta yake na kisha akauvaa mkoba begani halafu akachukua pakiti la sigara,akatoa moja akaiwasha na kupiga mikupuo kadhaa halafu akatoa moshi mwingi akaupuliza hewani.Akalifunga gari lake kwa ufunguo kisha akabeba chupa zake mbili na kwa mwendo wa madaha akaanza kutembea kuelekea katika sehemu ya ufukwe.Hoteli hii ilisifika kwa kuwa na ufukwe tulivu na msafi.Watu wengi walipenda sana kuja kupumzika katika ufukwe wa hoteli hii maarufu.Watu wengi waliokuwepo katika hoteli hii wakipumzika jioni hii walimtolea macho ya mshangao binti huyu aliyekuwa akitembea taratibu kuelekea ufukweni lakini yeye hakujali mtu aliendelea kutembea kwa madaha huku akivuta sigara yake na katika mkono wake wa kushoto alikuwa ameshika chupa zake mbili moja ya maji ya kunywa na nyingine ya mvinyo.

   Kwa mwendo wake wa taratibu akafika ufukweni na kisha akapanda katika mwamba uliokuwa pembeni ya bahari na kuanza kuishuhudia mandhari nzuri na ya kuvutia.Akauweka chini mkoba wake wenye kompyuta na zile chupa zake mbili kisha akasimama na kuiangalia bahari kwa muda na taratibu akajikuta macho yake yakidondosha machozi.Akatoa sigara na kuiwasha akavuta kwa fujo na kupuliza moshi mwingi hewani.Akaitazama tena bahari halafu akashuka chini kidogo ya mwamba ule sehemu ambayo maji ya bahari yalikuwa yakipiga kisha yakaruka na kutawanyika .Akasimama pale kwa kama dakika tatu hivi akiwaza .Akafuta machozi

   “Siku maisha yangu yalipobadilika nilikuwa nikichezea maji katika mwamba huu.Siwezi kamwe kupasahau mahala hapa.Pana historia kubwa kwangu.Ni sehemu ambayo naweza kusema kwamba nilianzia rasmi kubeba mzigo wa matatizo,mateso na machungu ya dunia hii. " akawaza msichana yule akainama na kuyachezea maji kwa mikono yake akatabasamu.

  “Nilizoea kuja hapa na kuchezea maji kila mwishoni mwa wiki wakati nikiwa likizo.Nilizoea kuja hapa na mtu niliyemuamini,nikampenda,nikamthamini,nikampa moyo na mwili wangu,nikamuita majina yote mazuri ya dunia hii,sweetie,honey, baby,love,na nikamuita jina kubwa na lenye kutukuka la Angel nikiamini kwamba alikuwa ni malaika wangu anayeishi na kunifanya niifurahie dunia..lakini kumbe nilikosea sana nilikuwa sijui kama nimemkabidhi moyo na nafsi yangu shetani mwenye umbo la binadamu..." alipofika hapa akashindwa kuyazuia machozi kumtoka.

  “ Nakuchukia Jimmy ..nakuchukia sana. na kama kuna kitu ambacho kitanipeleka katika moto wa jehanamu ni chuki kubwa niliyonayo juu yako.I hate you Jimmy..I hate you so much....Hata baada ya miaka mingi kupita lakini bado ninakuchukia sana.Kokote uliko Jimmy fahamu kwamba ninakuchukia kupita kiasi na kama ningepewa nafasi ya kuchagua kitu kimoja nifanyiwe katika hii dunia basi ningechagua uteseke hadi siku yako ya kufa.” akasema kwa sauti ndogo msichana huyu lakini iliyojaa hasira ndani yake. Akafuta machozi yaliyokuwa yakimtiririka na kisha akapanda tena juu ya mwamba akalishuhudia jua la jioni likiing'arisha bahari na kuipa mandhari ya kuvutia.Akatabasamu kisha akakaa chini akaifungua chupa yake ya mvinyo akanywa funda mbili akaiweka chini.

  “Siku zote namsifu Mungu kwa uumbaji wake uliotukuka.Mungu aliumba dunia kwa nia njema kabisa akaweka kila kitu kizuri ndani yake.Aliumba wanyama ,mimea na kila kitu ambacho alifikiri kwamba ni chema na akakiweka humu duniani lakini katika viumbe vyote alivyoumba Mungu alimuweka mwanadamu juu ya kila kitu akitawale.Kwa bahati mbaya binadamu huyu amebadilika na kuwa mbaya kuliko hata wanyama.Binadamu amebadilika na kuwa na roho ya kishetani.Wakati anaumba binadamu Mungu alisema kwamba na tumfanye mtu kwa mfano wetu .Mafundisho yanasema kwamba binadamu ni mfano wa Mungu lakini binadamu wa sasa wameipoteza taswira ile ya Mungu yenye kuwaka nuru ya amani na upendo na badala yake wameivaa taswira ya ibilisi yenye kuzongwa na tamaa ya mali na utajiri wa dunia hii,ubinafsi,na kila aina ya ukatili.Upendo umepotea siku hizi.Hakuna ule upendo wa kweli .Binadamu hatupendani hata kidogo siku hizi. Maandiko yanasema kwamba katika siku za mwisho watu watakuwa ni wenye kujipenda wenyewe.Nafikiri hizi ndizo nyakati zile za mwisho kwa sababu ule upendo uliowekwa ndani mwetu umepotea na kila mtu sasa hivi anajijali mwenyewe..." akawaza msichana yule halafu akaichukua tena chupa yake ya mvinyo akanywa funda kadhaa na kuirudisha tena chini.

   “ Kila nikiiangalia dunia sitamani tena hata kuishi ndani yake .Lakini kwa muda huu mfupi nilioishi hapa duniani sijayafurahia maisha hata kidogo.Ninawachukia binadamu sana.Mungu atanisamehe kwa kuwa na chuki kubwa namna hii kwa binadamu aliowaumba kwa mkono wake.Katika umri wangu huu mdogo nimejifunza mambo mengi sana na ambayo nitayaandika na kuyaweka kama kumbu kumbu na siku moja watu watayasoma na kuutambua ubaya wa binadamu.Nina imani kila mtu atakayesoma simulizi yangu atakubaliana nami kwamba dunia ya sasa imebadilika sana na binadamu ambao Mungu aliwaumba ili waishi maisha ya kumuambudu na kumtukuza yeye pekee kwa sasa wamemuweka pembeni na kumgeukia ibilisi ambaye anawadanganya kwa kuwapa furaha ya dunia na maisha matamu na kusahau kwamba Mungu huyo huyo wanayemuweka pembeni leo hii na kumpigia magoti ibilisi ndiye aliyemuumba ibilisi .Nataka niwaeleze watu kila nukta ya maisha niliyoyapitia.Nataka watu wapime wao wenyewe ni jinsi gani binadamu walivyo wanyama lakini papo hapo nataka niwape fundisho kwamba siku zote Mungu atabaki muumba na siku zote hakuna kiumbe mwingine kama yeye na humpa kila mwanadamu kile akiombacho kwa wakati ambao anaona yeye unafaa.Ninataka niwafundishe pia binadamu kwamba siku zote upatapo shida hutakiwi kukata tamaa.Matatizo ni sehemu ya maisha yetu na kupitia matatizo tunajifunza mambo mengi sana yaliyoko katika dunia hii ambayo bila ya matatizo hayo kamwe huwezi kuyafahamu.Kupitia matatizo tunafahamu upande wa pili wa mwanadamu ukoje.Mwanadamu ambaye kila siku uso wake umepambwa kwa tabasamu pana sana na akikuchekea hadi meno yote yanaonekana lakini ukiufahamu upande wake wa pili hutatamani tena hata kumuona mwanadamu huyo." akawaza yule msichana mrembo kisha akaichukua tena chupa yake ya mvinyo akanywa ,akaitazama bahari akatabasamu.

  " Hii ni sehemu ya kwanza ambayo nitaanza kuiandika simulizi yangu kwa sababu ndipo mahala kila kitu kilianzia.Nitatembelea sehemu zote ambazo nilikuwa nikizipenda,sehemu ambazo nilikuwa nikipata furaha,sehemu ambazo zilinifanya niipende dunia hii,sehemu nilizocheza na watoto wenzangu wakati huo na sehemu ambazo nilizoea kwenda na wazazi wangu ,nataka nikaziangalie kwa mara ya mwisho sehemu hizi zote kwa sababu sintapata tena nafasi ya kuziona au kupata furaha niliyokuwa nikiipata nyakati hizo.Nitaishukuru kila sehemu kwa kuwa iliwahi kuwa sehemu ya furaha yangu kwa wakati huo kabla sijawafahamu binadamu makatili.Kwa leo nitasema kwa heri kwa sehemu hii muhimu sana ambayo nilianzia safari yangu ya matatizo.Ninafurahi kupaona tena mahala hapa ambako miaka kadhaa uko nyuma palikuwa ni sehemu ya furaha yangu.Nilizoea kuja hapa na kuyaona na kufurahia mawimbi ya bahari yalivyokuwa yakiupiga mwamba huu na kisha maji yake kuruka na kutawanyika.Nilipenda kukaa na kurukiwa na maji ya bahari .Nilihisi furaha ya ajabu sana kipindi hicho lakini kwa sasa siwezi tena kuipata furaha hiyo.Siwezi tena kukaa na kuyafurahia tena mawimbi ya bahari yanavyoupiga ukuta wa mwamba huu.Sina tena sababu ya kufurahi .Nifurahi kwa sababu gani hasa? kwa nini nifurahie kuishi katika dunia iliyojaa wanadamu makatili wasio kuwa hata na chembe ya huruma? Sioni sababu ya kuwa na furaha katika dunia hii.Kitu kimoja tu ambacho kinanipa furaha kwa sasa ni kila nikiwaona wadogo zangu wapendwa ambao ndio ndugu zangu pekee ninaowafahamu wamekuwa watu wakubwa na wanaendelea vizuri na maisha yao.Nafurahi kwa sababu  hata baada ya matatizo yote haya kutokea lakini hata siku moja sijawahi kukubali taabu ya aina yoyote ile iwapate.Wamesoma na hadi sasa wamepata kazi na kila mmoja anajitegemea Ninasikia furaha sana nikiwaona wadogo zangu wakitimiza ndoto zao maishani.Kwa hilo ninaweza nikasimama na kujivuna mbele ya ulimwengu kwamba mimi ni mwanamke wa shoka.Nimesimama imara kuhakikisha kwamba ndugu zangu wanakuwa  na maisha bora.Nimewaongoza katika njia njema hadi hapa walipofika japokuwa mimi sikupitia njia iliyo njema hata kidogo.Muda wangu umefika sasa wa mimi kupumua na kumshukuru Mungu na kuwaacha ndugu zangu waendelee na maisha yao wao wenyewe na mimi nitafutika katika upeo wa macho yao na hawataniona tena .Najua watalia sana lakini watabaki na kumbu kumbu kubwa kwamba nilisimama kidete kuhakikisha kwamba wanapata elimu safi na malezi bora yenye maadili na wao watafanya vivyo hivyo kwa familia zao.Watahakikisha kwamba siku zote wanasimama imara katika kuzilinda familia zao hata kutokee dhoruba kali namna gani." akawaza msichana yule akachukua tena chupa yake ya mvinyo akanywa halafu akatoa sigara akaiwasha na kuendelea kuvuta huku akipuliza moshi mwingi hewani.

   "Hata wadogo zangu watastushwa sana pindi watakapoisoma simulizi yangu kwa sababu kuna mambo mengi ambayo hawakuwa wakiyafahamu kuhusu mimi.Sikutaka wafahamu kila kitu kilichokuwa kikiendelea katika maisha yetu .Sikuwapa nafasi hiyo kwa kuhofia wangeathirika kisaikolojia.Natumai watanisamehe kwa yote yaliyotokea kwa sababu sikutaka wao wahangaike na kupata taabu .Hadi sasa sina ule ujasiri wa kukaa nao na kuwaeleza ukweli halisi wa kila jambo.Nimejaribu kutafuta ujasiri huo lakini nimeshindwa kutokana na mambo hayo kuwa mazito sana kwa wao kuyafahamu japokuwa kwa sasa wamekwisha vuka lile rika la utoto.Watafahamu kila kitu kupitia simulizi hii kwani nitaandika kila kitu kilichotokea katika maisha yangu na sintaacha hata nukta moja na nitaeleza ukweli mtupu....only the truth..najua wataumia sana lakini wakati huo sintakuwepo katika upeo wa macho yao kwa hiyo sintapata nafasi ya kuyaona machozi yao.Nitakapokamilisha kuandika simulizi hii nitapotea kama upepo lakini kitu kimoja tu ambacho nitakuwa nikijivunia kila siku ni kwamba mimi ni mwanamke jasiri ambaye nina uwezo wa hata kuibadili dunia." akawaza halafu akamalizia kuivuta sigara yake na kipande kilichobaki akakitupa majini.

   "Muda mwingi nimekuwa nikiwaza mambo ya ulimwengu huu na kusahau kitu kilichonileta hapa.Nilikuja mahala hapa kuanza kuandika simulizi yangu na nikishamaliza nitasema kwa sehemu hii heri kwa sababu sintapaona tena mahala hapa nilipopapenda mno wakati huo bado sijaufahamu ulimwengu ukoje.Jua linakaribia kuzama ngoja nianze kuandika simulizi yangu kabla ya giza kuingia.Nitaanzia siku ile maisha yangu yalipoanza kubadlika nikiwa hapa hapa katika mwamba huu." akawaza huku akiichukua kompyuta yake ndogo toka katika mkoba wake mdogo akaikunjua akaiwasha na kuiweka mapajani mwake na kisha akafungua sehemu ya kuandikia akaanza kuandika.

   “ Hii ni sura ya kwanza ya simulizi yangu na wakati huu nilikuwa najulikana kama Linah japokuwa jina hili nimelibadilisha mara kadhaa.” Akawaza halafu  sura y akijan a mmoja ikamjia

            “ Ouh Genes ! najaribu kukusahau lakini badi unaendelea kunijia akilini.” Akasema Linah na kuinama chini

            “Bado moyo unaniuma sana kila nikimkumbuka Genes na maumivu niliyomsababishia.Hii itakuwa ni sura yak mi nay a mwisho ya kitabu change.Nitaeleza kila kitu kuhusiana na kuzama katika penzi la kweli na kijana hyu lakini kwa sababu zilizo nje ya uwezo wangu ndoto yetu ya kuwa pamoja haikuweza kutimia.Yawezekana Genes akanielewa pale atakapokisoma kitabu change..” akawaza Linah  hlafu akafungua chupa na kupiga funda la mvinyo.

            “ Sitakiwi kuendelea kuumiza kichwa kwa suaal hili la Genes.Nimekwisha achana na maisha y amaigizo ya Arusha na kwa sasa nimerudi katika maisha yangu halisi kama linah.Naomi wakati wake umekwisha.” Akawaza Linah

            “ Muda unakwenda sana ngoja nianze kuandiak simulizi yangu.Na huu ndio mkasa wangu ambao ninataka dunia nzima iusome.Naanza na sura ya kwanza" akawaza na kuanza kuandika.

NAOMI AMERUDI KATIKA MAISHA YAKE YA AWALI NA ANALIRUDIA JINA LAKE HALISI LA LINAH..NINI HISTORIA YA MAISHA YAKE? ILI KUFAHAMU MKASA MZIMA WA MSICHANA HUYU ENDELEA KUFUATILIA  SURA KUMI ZA SIMULIZI YAKE.