SERENA SEHEMU YA 2

ILIPOISHIA SEHEMU ILIYOPITA

“Serenaa…!!!!!!.  Akasema Dr Jason kwa mstuko  mkubwa.

 Kila mtu mle chumbani akastuka na kubaki akishangaa.Serena ambaye alikuwa ameongozana na mama yake na Isabella naye akabaki ameduwaa akishangaa.

            “ Jason ..!!!!!  ..akasema Serena kwa sauti ndogo.Isabella mdogo wake aliyekuwa amekaa pembeni yake akageuka na kumtazama dada yake kwa mshangao.

ENDELEA…………………..

JAKAYA SEKONDARI  - IRINGA

            Dakika tatu zimekwisha pita sasa toka Jason alipoanza kuikodolea macho picha aliyoishika mkononi.Aliporidhika akairudisha chini taratibu.

             “Du!  nimekubali .Hapa pana kazi.Unajua siku zote umekuwa ukisema mambo mnegi kuhusu Serena lakini sikuwahi kumuona ni msichana wa namna gani.Kumbe mtoto mwenyewe ni huyu!!!…mhhh..” akasema Jason kisha akaishika tena ile picha na kuiangalia kwa makini zaidi.Raymond au Ray kama wenzake walivyozoea kumwita  alikuwa akitabasamu na kutoa kicheko kidogo cha chini chini.

            “ basi huyo ndo Serena homa ya jiji la Mbeya.Anaitwa Mbeya Fever.Serena anaitikisa Mbeya  kisawa sawa .Kila kona ukipita Serena anavuma.Ni binti wa kipekee mno.” Ray akasema huku akiachia tabasamu pana.

            “Nimekubali ! This is a fever.She's so hot.” Jason akasema taratibu huku akiendelea kuikodolea macho ile picha aliyoishika mkononi..

            Kimya kikapita cha sekunde kadhaa ,Ray akiendelea kupanga nguo zake katika sanduku  na Jason  akiendelea kutazama albamu la picha za Ray.Kila akifungua kurasa mbili husimama akaichukua na kuiangalia tena picha ya Serena binti  mwenye uzuri wa kipekee  .Alivutiwa mno na Serena kiasi cha kuiangalia picha ile kila mara bila kuchoka. 

            “ Ray kwa nini mpaka sasa hivi hujafanya juhudi zozote za kumpata Serena wakati una nafasi kubwa ya kumpata  hasa ukizingatia kwamba  Dada yako Nange ndiye rafiki  mkubwa wa Serena?.Kwa nini usiitumie nafasi hiyo kuwa karibu zaidi na Serena kwa kumtumia Nange?” akasema Jason

            Huku akitabasamu Ray akajibu

            “Jason ,si rahisi kama unavyodhani.Nimejaribu kila njia ili walau nijiweke karibu na Serena lakini imeshindikana.Niliwahi kujaribu kumtumia Nange lakini ilibaki kidogo hata urafiki wao uvunjike kabisa.Serena kitu mapenzi kwake ni sumu .Hataki kabisa kusikia ukimtajia kitu hiki.Mpaka leo hii haijulikani kama ana mpenzi au hana.Hata Nange ambaye ni rafiki yake wa karibu mno hajui chochote kuhusu historia ya kimahusiano ya rafiki yake.Hawajawahi kuongelea suala hilo hata siku moja.Wapo wanaodai eti ana mpenzi  wake anayesoma Marekani,wengine wanasema eti ana mpenzi wake anayesoma Cuba,ilimradi kila mmoja anatamka lake,hakuna mwenye uhakika wa jambo lolote lile.”

            “Mhh! Nadhani atakuwa na siri kubwa iliyojificha moyoni mwake.Au ameamua kwanza amalize masomo halafu mambo ya mapenzi baadae.” Jason akachombeza

            “Inawezekana ameamua hivyo kwa sababu hata shuleni yeye ndiye mwanafunzi bora kila mwaka.Pamoja na hayo yote lakini bado sijakata tamaa,najua iko siku nitamtia mikononi.Mimi ndio Ray bwana”  Ray akajisifu huku akicheka kichini chini.

            “Nakuaminia mkubwa wangu.Manake hata kuongea na mtoto kama huyu bado ni hatua kubwa”Jason akasema

            “Eh ! si mchezo Jason, Serena si msichana wa kuonekana hovyo hovyo. Familia yao inajiweza kimaisha. Baba yake ni mmoja kati ya wafanya biashara wakubwa hapa Tanzania.Mimi nina bahati ya kuonana naye mara kwa mara kwa sababu huwa anakuja nyumbani kwetu akiwa na Nange na mara nyingi hupenda kushinda pale ndio maana unaona nina mazoea naye japo kidogo kwa sababu hapendi mazoea na wavulana.Ni nadra sana kumkuta akizagaa mitaani. Serena ni mcheshi japokuwa si mwongeaji sana.Ila unapokuwa unaongea naye ni lazima uwe makini  kwa sababu ni binti mwenye uelewa mkubwa .Nadhani utakapopita nyumbani wakati wa likizo unapoelekea Tunduma utapata bahati ya kumuona.Nitamwelekeza  Nange akutambulishe kwake.Nasikitika kutokwenda Mbeya likizo hii.Ingekuwa si kama kaka alinisisitiza sana niende Zanzibar kumtembelea ningekupeleka mimi mwenyewe kukuonyesha homa hii ya Mbeya..” Sentensi hii ya mwisho inamfanya Ray anyong’onyee ghafla .

            “Usijali Ray Bado una nafasi nzuri ya kumpata Serena hata kama uko mbali.Nitafurahi sana kama nikimuona binti huyu anayeumiza vichwa vya watu wengi.” Akasema Jason.

            Ni Jumamosi iliyojaa kila aina ya heka heka.Siku hii ya mapumziko wapo wanafunzi waliokuwa wakifua,wengine wakijisomea madarasani,wengine walikuwa na safari zao binafsi.Jason na Ray wao walikuwa bwenini wakibadilishana mawazo.Jason na mwenzake Ray walikuwa ni wanafunzi wa kidato cha tano.Wawili hawa walikuwa ni marafiki wakubwa.Wengi walihisi labda ukubwa wa urafiki wao ulitokana  na wote wawili kuwa wanashabihiana sana katika kila jambo,kuanzia utanashati hadi kiwango cha darasani.

            Mchana huu walikuwa wakisimuliana mambo mbali mbali juu ya huko watokako na kubwa zaidi ilikuwa ni hadithi ya Serena,Homa ya jiji la Mbeya.Jason alionekana kuvutiwa sana na simulizi zinazomuhusu serena na akahitaji kumfahamu zaidi

             “Baba yake Serena amechanganya damu .Baba yake ana asili ya Ureno na mama yake ni Mtanzania halisi mtu wa Mbeya. Serena ana mdogo wake anaitwa Isabella ,sasa huyo Isabella ukimuona  ndio balaa tupu.Unaweza kuchanganyikiwa ukimuona..Nina hakika kama angepata bahati ya kushindania taji la miss Tanzania basi angeshinda na hata kuchukua ubingwa wa dunia.” akasema Ray na wote wakacheka

            Jason alizidi kuvutiwa na hadithi za Ray.

            “Ngoja, nikuonyeshe picha nyingine.”Ray akasema akafungua sanduku lake na kutoa albamu lingine la picha akafungua na kumwonyesha Jason ..

            “ Hapa Serena  alikuwa Ulaya walikuwa wameenda kupumzika na familia yake..Picha hii niliiba katika albamu la Nange .Serena huwa hapendi mtu aone picha zake kama hizi”

            “ My gosh !!!!”Jason akatoa ukelele wa mshangao huku akiushikilia mdomo wake.

            Ray akatabasamu baada ya kuuona mshangao ule wa Jason

            “She’s hot.That’s what I can say”Akasema Jason.Ray akacheka kicheko kikubwa.

            Wakati wakiendelea kuitazama picha ile ya binti mrembo ,kengele ya kuashiria kwamba ni wakati a chakula cha mchana ikagonga na wanafunzi wote wakaelekea katika bwalo la kulia chakula..

MIEZI MINNE BAADAE

            Usiku wa kuamkia siku ya kufunga shule ulikuwa ni usiku mrefu sana.Hakuna mwanafunzi aliyetaka kulala.Kila mmoja alikuwa na uso uliojaa furaha isiyo kifani,furaha ya kumaliza muhula wa masomo na hatimaye kurejea nyumbani kwa mapumziko.Maongezi ya kupongezana na kutakiana likizo njema ndiyo yaliyotawala usiku huu.

            “Jason ,sanduku hili dogo naomba umpe mama anihifadhie chumbani kwangu.Ni baadhi ya vitu vyangu ambavyo sivitumii hapa shuleni.Halafu barua hii mpe Nange wewe mwenyewe kwa mkono wako.Kiboksi hiki pia mpe Nange mwambie ni zawadi ya Serena.Maelekezo yote nimemwandikia katika barua” akasema Ray

Jason akatabasamu.

             “Sawa nimekuelewa.Nitafikisha maagizo jinsi yalivyo.Lakini kumbuka unamtuma fisi katika bucha” Akatania Jason huku akicheka.

            “Halafu Jason sitaki mazoea ya karibu na Nange.Huwa hamkawii nyie kila mkimuona binti mzuri.” akasema Ray na kumfanya Jason acheke kicheko kikubwa.

            Saa tano mchana siku iliyofuata shule ikafungwa na wanafunzi wote wakatawanyika.Gari zilifika shuleni kwa ajili ya kuwabeba wanafunzi na na kuwapeleka sehemu mbali mbali.Kwa kuwa Ray  alikuwa akielekea Zanzibari kwa kaka yake ilimbidi apande basi lililokuwa likielekea Iringa mjini ili kesho yake apande basi la kuelekea Dar es salaam. Jason yeye akapanda basi lililowabeba wanafunzi wanaoelekea Mbeya na saa nane na dakika ishirini safari ikaanza.

             Jason alikuwa akitabasamu kila mara picha ya Serena ilipomjia kichwani

            “I’m coming to see you Serena”Alijisemea kimoyo moyo huku basi likendelea kuchanja mbuga.

             Saa kumi na moja jioni waliwasili katika jiji la Mbeya ambalo kwa jioni hii lilipendezeshwa na kijua kitamu cha jioni na kiubaridi kwa mbali. Alishuka garini akachukua taksi ambalo lilimpeleka moja kwa moja hadi maeneo ya Block T katika nyumba moja kubwa yenye geti jeusi ambako kwa mujibu wa maelekezo aliyopewa hapo ndipo nyumbani kwa akina Ray.

            Akalisogelea geti na kubonyeza  kengele, na baada ya dakika kama tatu hivi mlango mdogo ukafunguliwa na dada mmoja akajitokeza.

            “Habari yako dada” Jason akamsabahi yule mwanadada.

            “Nzuri karibu”

            “Ahsante.Naomba kuuliza eti hapa ndipo nyumbani  kwa akina Nange?

            “Ndiyo hapa unamtafuta Nange?

            “Mimi ni mgeni wao nimetoka Iringa.Naitwa Jason ninasoma shule moja na Ray.”

            Yule msichana akamwambia Jason asubiri hapo hapo getini na baada ya dakika mbili akarejea akiwa ameongozana na mama mmoja mnene mweupe.

            “karibu sana baba” Alisema mama yule ambaye bila hata kutambulishwa Jason alijua alikuwa ni mama yake Ray kwa jinsi walivyofanana.

            “mama shikamoo” akasalimia Jason

            “Marahaba baba .Pole na safari”

            “Ahsante sana mama””

            “ Mbutolwe  chukua mizigo ya kaka yako ipeleke chumbani”        Yule msichana mara moja akachukua mabegi ya Jason na kuyapeleka ndani.

            “ Vipi hukupata tatizo lolote njiani? Ray kanipigia simu mida ya kama saa sita hivi akasema uko njiani unakuja, mpaka saa hizi nikawa na wasi wasi labda mmepata matatizo njiani.

            “Hapana mama sikupata tatizo lolote njiani safari ilikuwa nzuri tu.Gari ndilo lilikuwa likienda taratibu sana” akajibu Jason

            Baada ya maongezi mawili matatu akapelekwa katika chumba cha Ray kwa ajili ya mapumziko.Kilikuwa ni chumba kikubwa chenye vitu vingi.Akachukua taulo na kuingia bafuni kujimwagia maji kisha akajitupa kitandani usingizi ukampitia. 

*                      *                      *                      *

                       

            Mtu aliyekuwa akigonga mlango ndiye aliyemstua Jason toka usingizini.Mwanzoni alihisi ni kama anaota vile lakini baada ya kufumbua macho yake na kutega sikio kwa makini akagundua ni kweli kuna mtu alikuwa anagonga mlango.Akainuka na kwenda kufungua mlango.

            “Samahani kaka,mama anakuita sebuleni” Alikuwa ni Mbutolwe yule msichana wa kazi

            “Ok dada nakuja”

            Alipotazama saa ilipata saa moja na nusu hivi.Alikuwa amelala sana kwani jana yake hawakuweza kulala hata kidogo kutokana na furaha ya kufunga shule.Muda huo hali ya hewa ya jiji la Mbeya ilikuwa ya kiubaridi baridi kama ilivyo kawaida ya jiji la Mbeya.Akavaa koti na kuelekea sebuleni

            “Karibu baba” Akasema mama Ray baada ya Jason kuingia sebuleni.

            “Ahsante mama nimeshakaribia.”

            “Nimeona umelala sana nikaona bora uamshwe ili utupe habari za shule.Vipi Ray anaendeleaje huko? Akauliza mama yake Ray

            “Ray anaendelea vizuri mama,kwa sasa amekwisha zoea mazingira ya shule na hata maendeleo yake pia ni mazuri” Akajibu Jason

            “ vipi masomo?walimu wapo wa kutosha, na wanafundisha ?

            “Ndiyo mama ,walimu wapo wa kutosha na kufundisha wanajitahidi sana.Ni shule nzuri kusema ukweli”

            “Nafurahi kusikia hivyo.”

            Wakati wakiongea mara akaingia msichana mmoja mweupe mzuri,mrefu na mwenye umbo lakuvutia.Jason akatupa jicho pembeni kumuangalia dada yule.Mara moja akagundua kuwa alikuwa ni Nange dada yake Ray kwani alikwisha muona katika picha za Ray.

            “Nange huyu ni kaka yako anaitwa Jason.Amefika jioni hii kutoka shule.Anasoma shule moja na Ray.Jason huyu ndiye dada yake Ray anaitwa Nange.”

            “Ouh kaka Jason karibu sana.Ray alinipigia simu kuwa utapita hapa kwetu .Karibu sana” Nange alikuwa ni binti mchangamfu .Alipotabasamu  uzuri wake ukaongezeka.

            “Dah ! haya ni majaribu sasa ” Jason akajisemea kimoyo moyo.

            “Ahsante sana Nange nimekwisha karibia.”

            Maongezi ya hapa na pale yakaendelea kisha wakapata chakula cha usiku wote halafu mama yake Ray akawaacha sebuleni wakiendelea kutazama filamu yeye akaenda zake kulala.

            “ kaka Jason ,Ray alisema amekupa maagizo yangu” Alianzisha mazungumzo Nange baada ya mama yake kuondoka na kumuacha na Jason sebuleni pamoja na msichana wa kazi.

            “Ndiyo ! alinipa maagizo yako ,ngoja nikuletee”

Jason akainuka akaelekea chumbani na kurudi na kifurushi kidogo pamoja na barua.Nange akaifungua barua akaisoma kisha akatabasamu na kutoa kicheko kidogo cha chini chini.

             “ Ray bwana,amesema nifanye kila ninaloweza nikukutanishe na Serena umuone,hahahaha !!!…” Akacheka kicheko kikubwa huku Jason akitabasamu

            “Amekwambia nini kuhusu Serena? Mbona ameweka msisitizo mkubwa namna hii…” Nange akauliza.

            Huku akitabasamu Jason akajibu.

            “ Ni maongezi ya kawaida tu ila alipenda  nimuone Serena ,walau nimsalimie.”

            Nange akacheka tena kicheko kikubwa.

            “Ok haina shida nitamleta akusalimie.Halafu umekuja wakati mzuri ,kesho kuna rafiki yetu ana birthday party yake na ametuomba tusikose mimi na Serena.Nilikuwa na wasi wasi sana kuhusu kuruhusiwa kwenda huko kwa sababu mimi huwa siruhusiwi kuwa nje ya nyumba baada ya saa kumi na mbili jioni labda nikiwa na Ray.Kwa vile wewe utakuwepo itabidi twende wote ili iwe  rahisi mimi kuruhusiwa kwenda.Huko ndiko utakapomuona Serena.”

            Hakuna mtu aliyeweza kuona furaha ya Jason kwa kauli ile ya Nange.kwa sasa kitu pekee alichokuwa akikihitaji ni kumuona Serena homa ya jiji la Mbeya.

            “Hakuna shida Nange, weka mambo safi ili kesho tuhudhurie hiyo sherehe.”

PICHA LINAENDELEA..TUENDELEE KUWA PAMOJA KILA SIKU

KWA SIMULIZI ZAIDI TEMBELEA HAPA MASIMULIZI