SERENA SEHEMU YA 11

RIWAYA : SERENA

SEHEMU YA 11

ILIPOISHIA SEHEMU ILIYOPITA

“Nimekuelewa ndugu mwenyekiti ,ila kuna kitu nataka kufahamu.Mr Kumzaya amezungumzia juu ya kupandikizwa kwa daktari wetu.Nataka kumfahamu daktari huyo ni nani na ana uwezo gani kiasi cha kutokutiliwa shaka siku za usoni..”

            Mr  Kumzaya akatabasamu kisha akasimama na kujibu.

            “Mr Avinash tunapokuwa na mtandao kama huu,si kwamba sisi tuliopo hapa ndio tunaoweza kufanya kila kitu na si kwamba kila aliyeko katika mtandao huu ni lazima afahamike.

Wapo watu wengine wengi na wazito ambao hawatakiwi kujulikana kabisa kama wanashirikiana nasi.Linapotokea suala linalotuhusu kila mmoja hufanya kazi hiyo katika sehemu yake.Kwa hiyo Mr Patel  usistuke.Tunao madaktari wa kutumainiwa wanaoweza kuifanya kazi hii kwa ufanisi katika mazingira yoyote na wakati wowote.Ila naomba nisiwataje kwa majina wala wanatoka katika hospitali zipi hapa nchini kwa sasa.Naomba tu muelewe kuwa  wapo na wako tayari kufanya kazo yoyote tutakayowapa”

            Kila mmoja mle chumbani akaridhika na majibu ya yaliyotolewa.Maelekezo machache yakatolewa na Mr Kamutere kisha kikao kikafungwa kwa makubaliano ya kukutana kesho saa sita mchana.

ENDELEA………………………………………..

            Dr Henry alikuwa amekaa katika kiti chake ofisini ,akitafakari juu ya kilichotokea na hatima ya mzee Albano bila kupata jibu. Akiwa bado  katika tafakari nzito mara simu yake inaita.Akanyoosha mkono na kuichukua.

            “ Mr Kumzaya.My very old friend.Siku nyingi sana hajanipigia simu”Akasema taratibu huku akitabasamu.

            “ Hello old boy” Akasema Dr Henry huku akitoa kicheko cha chini chini baada ya kuipokea simu ile.

             “hahahahaha ! its been a very lng time young man.How are you.” akajibu Mr Kumzaya.

            “I’m ok my friend.Vipi mbona kimya sana.”

            “Nilikuwa nje ya nchi kwa miezi miwili nimerudi wiki iliyopita.Vipi unaendeleaje wewe?

            “Mi naendelea vizuri Mr Kumzaya.”

            “Safi sana.Sasa Dr Henry ndugu yako nina shida kubwa ndiyo maana nimekupigia kuomba msaada wako”

            Dr Henry akastuka na kuuliza

            “Nini tena Mr Kumzaya? Unataka kuoa tena kwa sababu  wewe hukawii”

            “Hahahahah ! si mambo ya wanawake Dr Henry its something serious.Kwa sasa hivi uko wapi ?

            “Niko hapa hospitali.”

            “Ouh!. unaweza kupata walau dakika ishirini tukakutana kwa maongezi kidogo.Ni muhimu sana kama tukionana usiku huu ndugu yangu..Samahani lakini najua uko kazini lakini naomba ufanye kila unaloweza ili tuweze kuonana.Niko chini ya miguu yako Dr”

            Dr Henry akafikiria kwa muda kisha akasema

            “Ok Kumzaya ,tukutane wapi?

            “ Karmela coffee shop.”

            “Ok be there in 20 minutes.”

            “Thank you  so much old boy.”

            Dakika nzima ilikatika Dr Henry akiwa akitafakari.Mr Kumzaya alikuwa rafiki yake wa siku nyingi waliyekutana naye masomoni Uingereza.Wamekuwa marafiki wakubwa hata baada ya kila mmoja kuanza kazi na kuwa na familia.

            “Ngoja nimsikilize ana matatizo gani.Nakumbuka aliwahi kunisaidia sana kipindi kile nimepata ile kesi ya kugonga mtu.Alitumia muda wake na pesa nyingi kuhakikisha nashinda kesi.Tatizo la Kumzaya  haishi matatizo.Likitoka hili linakuja lile.”

            Dr Henry akavua koti lake la kazi akavaa koti la suti lililokuwa limetundikwa kabatini ,akafunga ofisi yake na kwenda kumuona Dr Jason.

            “Vipi maendeleo Dr Jason?

            “Mgonjwa anaendelea vizuri.”

            “Dr Jason mimi natoka nafika nyumbani mara moja .Nitarudi baada ya saa moja au mawili ila kama litatokea tatizo lolote tafadhali nifahamishe.”

            “Sawa Dr Henry Mimi  bado niko hapa naendelea kuangalia  mambo  yanaenda vipi.Naweza kuondoka baadae.Ila kuna mambo mawili matatu tutayajadili ukirudi”

            “Ok Dr Jason.Good job.See you later”

            Dr Henry akaondoka na kumwacha Dr Jason

*                      *                      *                      *

            “Dr Henry ,kwanza nakuomba samahani sana kwa kukusumbua kwa wakati huu ambao unatakiwa katika majukumu mengine.” Alisema Mr Kumzaya baada ya kukutana na Dr Henry pale Karmela coffee shop kama walivyokuwa wameahidiana muda mfupi uliopita.

            “Hata mimi nashukuru sana Mr Kumzaya kukutana nawe japo kwa wakati kama huu.Unajua wewe ni wewe ni zaidi ya ndugu.Ulinisaidia mno katika ile kesi ya kugonga mtu .Siwezi kuusahau msaada ule,hivyo jisikie amani kabisa Mr Kumzaya wala usihofu kitu.”  Akasema Dr Henry huku akiinua glasi yake na kupiga funda kubwa la bia.

            Mr Kumzaya akatulia kidogo kama kawaida yake halafu akasema.

            “ Dr henry ,nimekuita hapa nina shida kubwa sana.Sijaona mwingine wa kunisaidia zaidi yako.Nimeamua kukuita na kukuleza matatizo yangu kwa sababu nakuamini na wewe kama ndugu yangu nafikiri utanisaida katika kulipatia ufumbuzi suala ninalotaka kukwambia.” Akatulia na kumuangalia tena Dr henry aliyekuwa ametulia akisikiliza kwa makini.

            “Dr Henry kabla sijaendelea mbele naomba nikueleze kuwa jambo hili ninalotaka kukueleza naomba libaki kwetu sisi wawili tu kama ndugu .Sijui unaweza kuniahidi hivyo?

            Dr Henry huku akitabasamu akasema.

            “Mr Kumzaya wewe ni ndugu yangu.Nadhani mpaka ukaamua uniite hapa ni lazima utakuwa na imani kubwa na mimi.Kwa mantiki hiyo basi siwezi kukuangusha”

            Mr Kumzaya akatabasamu,akacheka kicheko cha chini chini kisha akasema

            “Dr Henry  miaka minne iliyopita ,serikali kupitia mpango wake wa mageuzi ya kijani,iliazimia kuanzishwa kwa mradi mkubwa wa umwagiliaji huko Mbeya.Mradi ule mkubwa ulikuwa ukamilike baada ya miaka minne yaani mwaka huu ndio ulikuwa mwaka wake wa mwisho.Kupitia kampuni yangu ya uhandisi nilishinda zabuni ya kandarasi ya mradi ule mkubwa.Sitaki kukuficha Dr Henry,mradi ule ulikuwa umeshikwa na baadhi ya vigogo na wafanya biashara wakubwa nchini.Nilishirikishwa katika mradi ule kwa lengo la kuitumia kampuni yangu na ndio maana kampuni yangu ikashinda tenda ile na kuziacha kampuni kubwa za kigeni zilizokuwa na uwezo mkubwa wa kuifanya kazi ile kwa haraka na kwa ufanisi.” Akatulia ,akapiga funda la kinywaji,akamtazama Dr Henry,kisha akaendelea.

            “Shughuli ilianza kwa kasi ya kutia matumaini.Baada ya miezi mitano, kupitia mtandao wa vigogo hao,kampuni iliweza kuidhinishiwa mabilioni ya fedha.Baada ya mwaka mmoja tena tukachota mabilioni mengine ya fedha na mwaka jana tumemaliza kabisa kiasi kilichokuwa kikitakiwa kulipwa kwa ajili ya kandarasi ile.Mpaka sasa hivi mradi umesimama na pesa za mradi zote zimekwishachukuliwa .Hakuna yeyote ajuaye kama mabilioni haya yamekwishachotwa na mtandao wa vigogo kupitia kampuni yangu.Kila kitu kimekwisha wekwa sawa,namaanisha kuhusu mambo ya kule benki kuu na si rahisi kwa mtu asiyehusika kuelewa kuhusu mabilioni haya mengi ambayo mengi ni fedha za wafadhili,kupitia mfuko wao wa kusaidia mapinduzi ya kijani Tanzania.Matakwa ya mradi huo yalitaka kushirikisha pia sekta binafsi,na wadau mbali mbali wa kilimo.Mzee Albano akaitwa na kuombwa kushiriki katika mradi huo na kuelezwa jinsi atakavyonufaika nao akiwa kama mdau mkubwa wa sekta ya kilimo kwani yeye ana viwanda vya kusindika mazao karibu katika kila mkoa nchini.Mzee Albano alikubali kushiriki katika mradi ule.Mambo yalibadilika pale mabilioni ya kwanza yalipotoka na yakagawanywa.Mzee Albano alishangaa pale alipopewa mgao wake.Mwanzoni alikataa lakini baada ya kuonywa kuwa ni lazima achukue pesa zile alizitunza katika akaunti maalumu bila kuzitumia.Mwaka jana mzee Albano aliibuka tena na kudai kuwa anataka kurudisha pesa zile alizogawiwa na  kujitoa kabisa katika mradi.Baada ya kumkatalia kufanya hivyo,aliazimia kurudisha fedha zile kwa lazima na kisha kuutangazia umma juu ya uchotwaji wa fedha ile nyingi.Kitendo cha yeye kutaka kuutangazia umma juu ya mradi ule hewa ni cha hatari kwani mtandao huu una vigogo wengi wa serikali na watu wenye nyadhifa kubwa,wafanya biashara wakubwa n.k.Hatukuwa tayari kuona hilo linatokea kwa hiyo azimio likawa ni kuhakikisha kwa gharama zozote zile mzee Albano ananyamazishwa.Natumai unaelewa ninamaanisha kitu gani.Si kwamba ugonjwa wa mzee Albano hautibiki ,lakini ilikuwa ni moja ya mikakati yetu ya kuhakikisha kuwa mzee huyu haponi na anakufa katika mazingira ambayo hayatakuwa na mashaka yoyote.Baada ya Dr Jason kugundua kuwa kuna uwezekano wa kumfanyia upasuaji mzee Albano imebidi tuingie kazini tena kuhakikisha kuwa kwa gharama zozote zile hili halifanikiwi.Sikufichi Dr Henry hata jaribio la jioni hii ni sisi ndio ndio tulilifanya na kwa bahati mbaya likashindikana.”

            Mr Kumzaya akanyamaza na kumtazama Dr Henry ambaye jasho lilikuwa likimtiririka usoni.Akatoa kitambaa na kufuta.Akalegeza tai yake kwa dhumuni la kupata hewa zaidi.Mr Kumzaya hakuogopeshwa na hali ile akapiga funda kubwa ,akakohoa kidogo kisha akaendelea.

            “Dr Henry ,nimetumwa na vigogo .Tunaomba utusaidie.Naelewa ni jinsi gani ulivyostushwa na taarifa hii lakini kwa kuwa nahitaji msaada wako sina jinsi zaidi ya kukueleza ukweli na ndio maana nilikueleza toka mwanzo kuwa tutakayoyaongea hapa yabaki kuwa yetu wawili tu.Dr Henry ,tunahangaika usiku na mchana,yote ni kwa ajili ya kupata maisha mazuri,watoto wetu waishi vizuri,wapate elimu bora.Hivyo ndio vitu vinavyotufanya mpaka tunafanya mambo yote haya.”

            Dr Henry akafuta tena jasho lililokuwa likitiririka.Akainama akafikiri kwa sekunde chache kisha akasema kwa sauti ndogo

            “I cant believe this……………”

            “Mr Kumzaya why are you telling me all these? Akauliza Dr Henry.

            “Because I want your help Dr Henry” Akajibu Mr kumzaya

            “My Help?! ……..You need me to be a part of you ?! Do you think I can do that? You are wrong my friend.I can’t do that.Siwezi kufanya kitu kama hicho na kamwe siwezi kuidhalilisha taaluma yangu ..”

            Dr Henry akatulia kidogo,akamwangalia Mr Kumzaya kwa jicho la hasira na kusema

            “Kumzaya siku zote nilikuthamini na kukuona kama ndugu,sikutazamia kabisa kama unaweza kujishughulisha na mambo kama haya.Haya ni mambo ya hatari sana na sitaki kuwa mmoja wa washiriki....” akasema Dr Henry halafu akasimama na kutaka kuondoka Mr Kumzaya akamshika mkono na kumketisha chini

            “Dr Henry hebu kaa kwanza unisikilize. Nafahamu ni jinsi gani ulivyoshtushwa na taarifa hii.Lakini hii ni moja ya njia za kujihakikishia maisha mazuri sisi na familia zetu.Dr Henry nakujua vizuri wewe ni mtafutaji mzuri wa pesa.Nayafahamu mambo yote unayoyafanya.Kwa mfano kwa hivi sasa una uhusiano wa kimapenzi na mke wa kigogo mmoja serikalini wakati nyumbani umeacha mke mzuri na msomi.Nini umefuata kwa yule mama kama sio pesa zake? Ninajua alikusafirisha kwenda Uingereza na ukakaa kule kwa miezi mitatu,ukamdanganya mkeo kuwa unaenda kusoma kozi fupi,lengo lilikuwa ni kwenda kukaa na mama huyu ambaye alikuwa amekwenda kwa shughuli zake za kibiashara.Hivi unajua ni kitu gani kitatokea iwapo mumewe akigundua kuwa unatembea na mke wake?Na ni vipi mkeo akifahamu kuwa unaisaliti ndoa yenu?.So my friend we don’t have to go there.We don’t need that.Hebu nielewe ndugu yangu .We need your help.Na kwa taarifa yako Dr Henry hata hapa tulipo niko na vijana wangu ambao wanatufuatilia kwa karibu,iwapo umezijua siri zetu na ukakataa kushirikiana nasi basi hawatakuwa na jinsi zaidi ya kutuma salamu za pole kwa familia yako.You know what I mean.Sikuogopeshi ila nakwambia ukweli.So why don’t we skip all these and just name your price Dr Henry  we’ll pay you.”

            Mr Kumzaya alimfanya Dr henry kunyamaza kimya. Wakatazamana kwa sekunde kadhaa Mr kumzaya akasema

            “Dr Henry najua tunachokiomba toka kwako ni kitu kikubwa sana.Msaada wako ndio nafuu yetu sisi.Kwa maana hiyo hata malipo yetu kwako ni makubwa vile vile.”

            Dr Henry akainua sura yake na kumtazama Mr Kumzaya

            “Tunakupa shilingi bilioni moja ,” Dr Henry akastuka

            “Unasema ? Akauliza Dr Henry kwa mshangao

            “Tunakupa shilingi billioni moja taslimu” Akarudia tena Mr Kumzaya.

            “Tunakupa gari jipya kabisa aina ya Mercedece benz” Akaendelea Mr Kumzaya

            “na mwisho tunakupa nyumba mpya kabisa ya ghorofa mbili iliyoko Mbezi”

            Dr Henry akatabasamu kisha akasema

            “You are kidding.that’s not true”

            “hahahahaa “akacheka Mr Kumzaya kisha akasema

            “Sikutanii Dr Henry .Tuko tayari kukupa hata zaidi ya hivyo kama utahitaji ilimradi tu tunachokitaka kitimie.”

            “Hebu niambie ni msaada upi mnaoutaka toka kwangu?Akauliza Dr henry huku akiwa na sura yenye tabasamu kwa mbali.

            “Dr henry tunafahamu Dr selemani ndiye aliyekuwa mtaalamu wa dawa za usingizi pale hospitalini kwenu na kwa sasa tayari amekwisha fariki.Tunataka siku ya operesheni ya mzee Albano,tumuweke daktari wetu wa dawa za usingizi.Huyu yeye kazi yake ni kuhakikisha mzee Albano analala moja kwa moja na haamki tena.Tunataka kifo kisicho na mashaka yoyote.Nadhani sio kitu kigumu kwako Dr Henry.Wewe ndiye daktari mkuu pale hivyo unauwezo wa kuamua lolote lile.”

            Dr henry akavuta pumzi ndefu sana.Akapumua kwa nguvu kisha akasema.

            “Ok Mr Kumzaya hiyo ni kazi ndogo sana kwangu.Nitakupa jibu lenye uhakika kesho saa nne asubuhi kwa sababu nahitaji kuonana na Dr Jason usiku huu ili tulizungumzie suala hili.Kesho saa nne asubuhi nitakujibu ni lini operesheni hiyo itafanyika”

            Mr Kumzaya alifurahi kupita kiasi baada ya Dr henry kukubali kushirikiana naye katika mpango ule wa kumuua mzee albano.

             “Nilijua hawezi kukataa.Pesa inaongea” akawaza Mr Kumzaya huku akicheka kicheko cha chini chini.

USIKOSE SEHEMU IJAYO……………………..

KWA SIMULIZI  ZAIDI TEMBELEA HAPA MASIMULIZI