BEFORE I DIE SEHEMU YA 8

RIWAYA : BEFORE I DIE

SEHEMU YA 8

ILIPOISHIA SEHEMU ILIYOPITA

            “Bado siamini kama mtu ninayeheshimika kama mimi nimedhalilishwa na machangudoa.Wamenichukulia kila kitu nilichokuwa nacho.Kama si kwa jitihada za mjumbe wangefanikiwa kunibaka wale wanaharamu.I hate them so much.Halafu Marina naye alikuwa yuko radhi kuona nikiaibishwa .Hakuwa akijali chochote.Na hata alipoulizwa kama ni kweli nililala naye na kumdhulumu fedha zake alikubali kuwa ni kweli …Masikini pamoja na wema wangu wote na kuonyesha kila dalili za kutaka kumsaidia lakini bado hakuonyesha jitihada zozote za kuukubali msaada wangu.
Aliipata bahati ambayo wenzake wanaitafuta usiku na mchana lakini yeye ameichezea na kuitupa mbali….Masikini mtoto mdogo kama yule anaangamia hivi hivi.Mtoto mzuri mwenye umbo safi na zuri anapotea hivi hivi jamii ikimuona…..Anyway sina namna nyingine ya kuweza kumsaidia.Kwa vile yeye mwenyewe ameonyesha hataki mabadiliko katika maisha yake na mimi sina budi kuachana naye.” Innocent akawaza akiwa kitandani kwake usingizi ukamchukua akalala.

ENDELEA………………………..

            Jumatatu asubuhi Innocent akawasili ofisini kwake.Siku hii alionekana mkimya na mwenye mawazo mengi.Kilichokuwa kikimsumbua kichwa ni tukio lililomtokea siku iliyotangulia la kudhalilishwa na Marina pamoja na kundi lake la wasichana makahaba.Kitendo kile kilimuumiza sana kila alipokuwa akikumbuka.

            “lengo langu lilikuwa zuri sana lakini sijui kwa nini msichana yule hakutaka kunielewa.Marina ameikosa bahati ambayo wenzake walio kama yeye wanaitafuta usiku na mchana.Ngoja niachane naye niendelee na kazi zangu japokuwa kila mara sura yake inanijia akilini na kunifanya nimkumbuke lakini sina namna nyingine ya kuweza kumsaidia.” Akawaza Innocent huku akiwa amekiegemeza kichwa chake katika kiti cha kuzunguka.Akiwa katika tafakari mara simu ya mezani ikalia akaiinua na kuiweka sikioni.

            “Bosi kuna mtu mmoja anahitaji kukuona anasema ulimuahidi aje akuone leo hii ofisini.Anasema anaitwa Bw Mustapha.” Alisema katibu muhtasi wa Innocent.

            “Ok mwambie apite ndani ” Innocent akasema na mara kumbu kumbu za tukio lililotokea jana zikarudi

            “Mzee Mustapha habari yako? Innocent akasema baada ya Mzee Mustapha kuingia mle ofisini kwake.

            “Ouh ! Mr Innocent habari yako? Akasema Mustapha katika hali ya mshangao kidogo.

            “karibu kiti Mzee Mustapha.” Innocent akasema huku akitabasamu.

            “Ahsante sana Innocent nimeshakaribia.” Akasema Mustapha

            “habari za toka tulipoachana jana? Innocent akauliza

            ‘habari nzuri Bw Innocent.Pole sana na majukumu” mzee Mustapha akasema

            ‘Nashukuru sana mzee Mustapha.”

            Mustapha alikuwa akitabasamu kana kwamba anatafuta kitu cha kuongea.

            “Hongera sana Bw innocent,sikutambua toka mwanzo kama wewe ni mtu mkubwa namna hii katika kiwanda kikubwa kama hiki.” Mustapha akasema huku akitabasamu.

            ‘ Bw Mustapha mimi huwa sipendi kuonekana kwa watu kama meneja au mtu mwenye uwezo wa juu .Napenda kuishi maisha ya kwaida sawa na watu wengine wenye uwezo wa kawaida.”

            Innocent akasema na kuifungua droo moja kati ya nne zilizoko katika meza yake akatoa bahasha nyeupe iliyokuwa imetuna

            “Bw Mustapha nilikuahidi kukupa ahsante yangu kwa namna ulivyonisaidia jana asubuhi.kama si wewe ningeaibishwa sana na wale wanawake.Ahsante yangu ni hii hapa” Innocent akasema na kumkabidhi Mustapha ile bahasha.

            “Bw Innocent nashukuru sana sana .U kijana muungwana sana.Napenda vile vile nikupe pole kwa tukio lile lililotokea.Lilikuwa ni tukio baya sana ambalo limekujengea picha mbaya .Mimi wale wasichana wanaishi eneo langu.Ninawafahamu vizuri sana na kama serikali ya mtaa tumepanga tuwaondoe eneo lile kutokana na athari wanazozisababisha kwa watoto wetu na wake zetu. wanaleta picha mbaya kwa vijana wetu wa shule ambao wanarubuniwa na kushawishika kufanya ngono isiyo salama na makahaba wale.Kwa ufupi  ni kwamba tumechoshwa na wasichana wale na hivi nikwambiavyo tuko katika mkakati mkubwa wa kuwaondoa na zoezi hilo litafanyika muda wowote hivi karibuni.” Mustapha akasema huku akiiweka ile bahasha aliyopewa mfukoni

            “Bw Mustapha mimi nakubaliana na wazo lako la kuwaondoa mahakaba wale toka katika mtaa wenu.Nilifanikiwa kuingia ndani mwao na kuangalia maisha wanayoyaishi kwa kweli si maisha ya kuishi binadamu na hasa wasichana kama wale.”Innocent akasema

            “Kweli kabisa Innocent ,wasichana wale ambao wengi wao wana nguvu na uwezo wa kuweza kufanya kazi nyingine za kuwaingizia kipato halali,wanaishi kama wanyama ndani ya zizi.Maisha yao ni ajabu ajabu sana.Unajua mimi nilishangaa mno na nimejiuliza maswali mengi bila majibu kwamba iweje kijana mzuri ,mwenye heshima na uwezo wake ,kijana ambaye ana uwezo wa kumpata mwanamke  yeyote amtakaye awafuate wale makahaba? Nimejiuliza sana bila kupata majibu”

            Innocent akatabasamu na kusema

            “Mzee Mustapha ukweli ni kwamba mimi sikuwa nimewafuata makahaba.Mimi ni kijana niliyelelewa katika maadili mazuri,familia yetu inauwezo mkubwa kiuchumi na hata kiwanda hiki ni mali ya familia.Katika maisha yangu sikuwahi kuota kama iko siku ningeweza kuwafuata wasichana kama wale.Kwa ufupi tu nikwamba mimi huwa ninaumia sana moyo ninapomuona binadamu mwingine akiteseka ama kuishi maisha ya shida hali mimi nina uwezo wa kutosha.Nimekuwa nikisaidia watu wengi tu ili waweze kuondokana na maisha wanayoyaishi .Siku ya jumamosi nikiwa na dada yangu na rafiki zetu kadhaa tulikwenda katika klabu moja ya burudani ili kustarehe kidogo baada ya shughuli za wiki nzima.Tukiwa pale nilimuona msichana ambaye baadae nilimtambua kama Marina akiwa kati kati ya kundi la makahaba.Kwa kweli niliumia sana na kujiuliza ni kitu gani kilipelekea msichana mdogo kama yule kuwapo usiku ule na makundi kama yale.Nilikuwa na nia ya dhati ya kumsaidia ,lakini kwanza nilitaka kumfahamu japo kwa undani kidogo ili nione ni jinsi gani nigeweza kumsaidia.Nilifanikiwa kuondoka naye kama mtu niliyekuwa nikitaka kulala naye kwa usiku.Nilikwenda naye hotelini lakini si kwa lengo la kufanya naye mapenzi kama yeye alivyokuwa akifikiri..Nilichokuwa nakitaka ilikuwa kumfahamu japo kwa ufupi na kujua sababu zilizopelekea yeye kujiingiza katika biashara ile .Alinieleza historia yake kwa ufupi ambayo kwa kweli inasikitisha sana.Nilimuonea huruma na kuamua kwa moyo wa dhati kabisa kumsaidia.Marina hakuwa tayari kwa msaaada niliokuwa nataka kumpatia ikiwa ni pamoja na kumpeleka shule na baadae kumtafutia kazi nzuri na kuyabadili maisha yake.Sikukata tamaa nikaamua kwenda naye hadi mahala anapoishi ili nione ni maisha ya namna gani anayaishi.Nilistuka sana na aina ya maisha wanayoishi wasichana wale baada ya kufika mahala anapoishi Marina.Nilishindwa kukaa katika chumba chao nikatoka nje.Pale nje nikafuatwa na mwanamke mmoja ambaye alionekana kama ndiye mkubwa wao akaniomba niingie ndani.Nilikubali nikaingia ndani na ndipo hapo purukushani ilioanza Walidai eti ni lazima nifanye mapenzi nao wote.Sikuwa tayari kwa upuuzi ule ndipo hapo vurugu ilipozuka hadi pale ulipotokea na kuniokoa toka mikononi mwa makahaba wale.Kibaya zaidi ni kwamba wakati nataka kufanyiwa mambo yale ya ajabu Marina alikuwa akiniangalia huku akivuta sigara yake akitabasamu.Inaonekana alikuwa amefurahi mimi kufanyiwa vile.Wema wangu,fadhila zangu vyote hakuviona kabisa.Nasikitika sana Mzee Mustapha kwa mambo waliyonifanyia,lakini mimi sikuwa nimekwenda pale kwa ajili ya kutafuta mapenzi,bali nilikuwa na lengo zuri la kutaka kumsaidia Marina.” akasema na kukaa kimya kwa muda huku akimtazama Mzee Mustapha.

            “Pole sana Innocent kwa mkasa uliokupata.Sasa nimekuelewa vizuri.Nasikitika sana kwa binti mdogo kama yule kukataa msaada uliokuwa unataka kumpatia na akakubali wenzake watake kukufanyia kitendo kibaya.Lakini pamoja na yote yaliyotokea na baada ya kufahamu nini lilikuwa lengo lako ninaomba niongee mambo machache .” Mzee Mustapha akasema.

            “hakuna shida mzee wangu unaweza kuendelea” akajibu huku akikaa makini kumsikiliza

            “Ninamfahamu Marina toka amezaliwa.Ninamfahamu marehemu mama yake toka alipohamia katika mtaa wangu,ninayafahamu maisha aliyokuwa akiyaishi.Marina ni mmoja kati ya watoto waliopitia maisha magumu na ya shida mno baada ya mama yake kufariki dunia kwani alikuwa bado mdogo sana..Mara nyingi nimekuwa nikisononeka moyo ninapoyaona maisha anayoyaishi.Mimi mwenyewe si mtu mwenye uwezo mkubwa,laiti kama ningekuwa na uwezo wa kutosha ningeweza hata kuchukua jukumu la kumlea kipindi kile mama yake alipofariki dunia kwani ndicho kipindi Marina alipobadilika na kuamua kuacha shule na kujiingiza rasmi katika biashara ya ukahaba.Innocent ninaamini kwamba Mungu amekuleta ili uweze kumsaidia binti yuile na kuyabadili maisha yake.najua si kazi rahisi lakini kama kweli una nia ya dhati ya kumsaidia binti yule tafadhali usiache.Jitahidi kwa kila namna unavyoweza na umsaidie Marina.Najua kwa kitendo walichokufanyia rafiki zake hutakuwa na hamu tena hata ya kumuona Marina.Lakini nakusihi sana usije ukaachana na mpango wako wa kumsaidia Marina.Ni binti ambaye anahitaji msaada mkubwa kwanza wa kiushauri na baadae kimaisha.”

            Maneno yale ya mzee Mustapha yakamuingia Innocent na kutokea upande wa pili wa sikio.Hakuwa na hamu tena ya kumuona Marina katika uso wake kutokana na namna walivyomtenda.

            “Mzee Mustapha nashukuru kwa ushauri wako,lakini sidhani kama nitathubutu tena kutaka kumsaidia Marina.Nilikuwa tayari kufanya jambo lolote lile ili kuweza kuyabadilisha maisha yake lakini hakuonesha kukubaliana nami na kukubali kubadilika badala yake akafurahi kuona wenzake wakinidhalilisha.Mzee Mustapha kila nikilikumbuka tukio lile ninapatwa na hasira na uchungu moyoni.Ni tukio la kwanza la aibu kuwahi kunitokea.Sidhani kama nitaweza tena kufikiria kumsaidia msichana yule asiye na shukrani.” akasema huku akiuma meno kwa hasira.

            “Innocent nakubaliana nawe kwamba kitendo walichokufanyia si cha kibinadamu.Lakini naomba uelewe kitu kimoja kwamba wale wasichana kwa sasa wanatumia dawa za kulevya,bangi na kila aina ya ulevi.kwa maana hiyo naweza sema kwamba akili zao si nzuri na ndiyo maana wanaweza wakafanya kitendo chochote hata cha aibu bila kuona haya.Hebu jaribu kuivuta picha ya Marina akiwa ndani ya kile chumba wanachoishi,halafu vuta tena picha nyingine ya Marina akiwa ni binti mrembo,mzuri akiwa ndani ya gari lake anaendesha.nafikiri unapata picha mbili tofauti kabisa.Picha ya pili inawezekana kabisa lakini kuna vikwazo vingi hadi Marina akawa ni msichana wa kwenye picha ya pili.Ili Marina afikie hatua ya kuwa msichana wa picha ya pili ni lazima apate msaada mkubwa  wa kumtoa hapa alipo sasa.Kumtoa Marina hapa alipo panahitaji watu wenye moyo mkubwa wa huruma na kujitolea.Nikiyatazama macho yako ninaona kabisa jinsi ulivyo na huruma na moyo wa kusaidia wengine.nakuomba tafadhali pamoja na mambo yote aliyokufanyia usiache kumsaidia binti yule.” Mzee Mustapha akasema na kumtazama Innocent machoni kwa sekunde kadhaa.Innocent akainama chini akafikiri halafu akavuta pumzi ndefu na kusema.

            “mzee Mustapha nimekusikia na nimekubali tena kumsaidia Marina.lakini safari hii nataka nimsaidie kwa kushirikiana nawe.Tukiunganisha nguvu zetu sote tunaweza tukamsaidia .Nimeamua kumsaidia kwa sababu ya heshima na busara zako lakini nilikwisha futa kabisa mawazo ya kumsaidia. Tena” Innocent akasema huku akimtazama Mzee mustapha usoni.Huku akitabasamu mzee Mustapha akasema

            “nashukuru sana Innocent kwa kukubali tena kumsaidia mtoto yule.Nakuahidi kuwa nitakuwa nawe bega kwa bega katika kutafuta njia ya kuweza kumsaidia binti yule.Nina imani kama tutaunganisha nguvu zetu sote tutaweza kabisa kumsaidia binti  yule.”

            “Nakubaliana nawe mzee Mustapha ,inatubidi tuunganishe nguvu katika kumsaidia Marina.Kama tumeamua hivyo ,naomba basi unipe ushauri tufanye kitu gani ili tuweze kumsaidia.? Innocent akauliza.Mzee Mustapha akawaza kidogo halafu akasema

            “Mimi ni mwenyekiti wa eneo analoishi.Ananifahamu vizuri na ananiheshimu sana.Ananisikiliza kwa lolote nitakalowambia.Nikitoka hapa asubuhi hii ninakwenda kuonana naye pale mahala anapoishi.Najua ni lazima nitamkuta kwa sababu baada ya kazi wanazozifanya usiku ,mchana kutwa huwa wanautumia kwa kulala.Nitaongea naye na nina imani atanisikiliza.Nitamsikiliza yeye ana mawazo gani na anahitaji tumfanyie nini.Lolote nitakalolipata nitakupigia simu na kukutaarifu.” Mustapaha akasema

            “Nashukuru mzee Mustapha kwa mawazo yako mazuri.Basi hakuna tatizo mzee wangu wewe fanya jitihada uonane naye,zungumza naye na usikie yeye ana mawazo gani na ni jinsi gani tunavyoweza kumsaidia.Lolote utakalolipata utanitaarifu kwa kupitia namba hizi hapa kwenye kadi hii” Innocent akasema huku akimpa mzee Mustapha kadi yenye namba zake za simu.

            “Usijali Innocent.Nikitoka hapa ninaelekea moja kwa moja kwa Marina halafu nitakupigia simu.” Akasema mzee Mustapha huku akiinuka tayari kwa kuondoka.

            “Bw Innocent ,pamoja na yote tuliyoongea lakini nina ombi moja ndugu yangu.” Akasema mzee Mustapha akiwa amekwisha inuka kitini.

            “Sema tu mzee wangu” Innocent akasema

            “Unajua hapa nilipo hata mimi sina kibarua chochote .Sina kazi yoyote ya kufanya kwa sasa.kwa kuwa wewe ndiye mkuu wa kiwanda hiki hauwezi ukanisaidia kunitafutia kibarua cha namna yoyote hapa ? Mzee Mustapha akasema.

            Innocent akainamisha kichwa akafikiri kidogo halafu akasema

            “Usijali mzee Mustapha.Naomba uniachie suala hilo kwa siku ya leo nilifanyie kazi halafu nitakupigia simu na kukutaarifu lini uje uanze kazi.usihofu kuhusu hilo.” Innocent akasema huku akimpa mkono na kumuaga mzee Mustapha ambaye alitoka mle ofisini akiwa na sura yenye tabasamu pana sana.

*                      *                      *                      *

            Saa nne za asubuhi akiwa ofisini kwake simu yake ikaita.Zilikuwa ni namba ngeni kabisa katika simu yake

            “hallow” Innocent akaita baada ya kuipokea simu ile

            “Hallow Innocent,mzee Mustapha anaongea”Ikajibu sauti ya upande wa pili

            “Ouh Mzee Mustapha.habari za toka tulipoachana.?

            “habari si nzuri sana Innocent”

            “Kuna tatizo gani? Marina umeonana naye? Innocent akauliza

            “Nilipotoka ofisini kwako nimekwenda moja kwa moja hadi anakoishi Marina kama tulivyokuwa tumepanga.Nimefika pale na kukuta kuna jambo limetokea.”

            “Jambo gani tena limetokea mzee Mustapha? Innocent akauliza kwa shauku ya kutaka kufahamu

            “Marina na wenzake watatu wamekamatwa na polisi asubuhi hii kwa madai ya wizi.Inasemekana kuna mtu walimuibia fedha na vitu vingine kama simu .Hivi sasa tunavyoongea Marina na wenzake wanashikiliwa kituoni na kwa jinsi ninavyofahamu kama akifikishwa mahakamani ni lazima atafungwa kwa sababu hana mtu yeyote wa kumuwekea dhamana.tafadhali Innocent tunatakiwa tumsaidie binti yule.Tunatakiwa tumsaidie haraka “ Mzee Mustapha akasema

            Innocent akawaza kwa sekunde kadhaa halafu akasema

            “Ok mzee Mustapha nakuja huko sasa hivi “

            Dakika takribani tano zilipita huku Innocent akiwa bado amesimama ofisini kwake akitafakari.

            “ Inanibidi nisahau yote yaliyopita na nimsaidie Marina.Hana ndugu wala mtu yeyote wa kumsaidia zaidi yangu.” Innocent akawaza huku akivuta pumzi ndefu

            Saa tano na dakika ishirini Innocent akawasili maeneo anakoishi marina.Alikuwa anapakumbuka vyema.Akasimamisha gari mahala alipokuwa amesimamisha asubuhi ya siku ile alipokuja na Marina halafu akampigia simu mzee Mustapha ambaye hakuchukua muda akafika pale.

            “Nipe habari mzee wangu nini kimetokea? Innocent akauliza

            “Marina amekamatwa kwa kosa la wizi.Yeye na wenzake watatu wanasemekana kumuibia mtu jana usiku katika baa moja.Kwa mujibu wa maelezo ya wenzake ni kwamba Marina na wenzake wanasadikiwa kuiba fedha na vitu vingne kama simu na mpaka sasa hivi bado vifaa vyote havijajulikana thamani yake.” Mzee Mustapha akasema

            “Twende kituoni tukapate taarifa zenye uhakika” Innocent akasema huku akimfungulia mlango mzee Mustapha akaingia garini halafu wakaelekea kituo cha polisi ambako Marina alikuwa akishikiliwa pamoja na wenzake watatu.

            “namsikitikia sana binti yule kwa maisha anayoyaishi.: Innocent akasema

            “hata mimi namuonea huruma mno .Mtoto mdogo kama yule kuanza kujiingiza katika makundi hatari katika umri mdogo kama ule .Laiti kama kungelikuwa na njia nyingine ya kuweza kumsaidia…” Mzee Mustapaha akasema

            “Ngoja kwanza tufanye jitihada za kumtoa ndani halafu tuone ni jinsi gani tunaweza tukamsaidia.” Innocent akasema

baada ya kufika kituo cha polisi Innocent akajitambulisha kuwa ni ndugu na binti aitwaye Marina ambaye anashikiliwa kwa kosa la wizi.Askari aliyekuwa akishughulikia suala la akina Marina akamvuta Innocent pembeni na kumueleza kila kitu kuhusiana na Marina.

            “kaka kesi ya ndugu yako si nzuri.Vifaa vilivyoibiwa thamani yake inakaribia shilingi millioni mbili.Tunamfahamu Marina.Si mara ya kwanza kufikishwa hapa kituoni.Amekuwa akiletwa hapa mara kwa mara.Tumekwisha mzoea.Mara nyingi tumekuwa tukijitahidi kumuonya aachane na tabia zake mbovu lakini mpaka sasa anaonekana amekwisha kuwa sugu.Nina hakika safari hii ni lazima afungwe gerezani.” Askari yule akamwambia Innocent wakiwa wamesimama faragha.

Innocent akainama chini akajaribu kutafakari nini cha kufanya.

            “Afisa,Marina ni ndugu yangu.Nasikitika sana kwa maisha anayoyaishi lakini pamoja na mambo anayoyafanya siwezi kumuacha.Ni lazima nimsaidie.Afisa hebu niambie utanisaidiaje katika kesi hii ili ndugu yangu awe huru?

            “Ndugu yangu sijui nikusaidiaje kutokana na ugumu wa kesi hii lakini kuna jambo moja ninaloweza kukushauri.” Askari akasema

            “jambo gani hilo? Innocent akauliza

            “Nenda ukaonane na mlalamikaji.Iwapo mtaonana mkaongea na mkakubaliana kwamba alipwe vitu vyake vilivyopotea basi kitakachofuata yeye atakuja hapa ,ataonana na mimi halafu tutafunga faili.Ni hilo tu ninaloweza kukusaidia kwa sasa.Jitahidi uonane na huyu jamaa mapema iwezekanavyo.”

            Afisa yule wa polisi akampa Innocent namba za mtu anayelalamika kuibiwa vitu vyake na akina Marina.Innocent akashukuru na kumuaga afisa yule kwa ahadi ya kuonana naye baadae.

            “mzee Mustapha kwa sasa inatubidi tukaonane na huyu bwana aitwaye Petro masawe ambaye ni malalamikaji katika kesi hii.Mimi niko tayari kumlipa vitu vyote vilivyopotea kama atakubali kufuta kesi ili Marina atoke .Ngoja nimpigie simu” Innocent akasema huku wakitembea kwa kasi kuelekea walipokuwa wamepaki gari.

            “ hallo” Ikasema sauti ya upande wa pili wa simu aliyokuwa amepiga Inno.

            “hallo habari yako ndugu? Inno akasema

            “habari nzuri.naongea na nani?

            “Ninaitwa Innocent.Samahani ndugu wewe ndiye bwana Petro steven masawe?

            “Ndiye mimi “

            “Ok vizuri sana bwana petro.Mimi ni ndugu wa mmoja wa wale mabinti waliokuwa wamekuibia jana usiku ambao wanashililiwa na jeshi la polisi..”

            “Ndiyo,unasemaje? Akauliza Petro

            “Ndugu yangu nahitaji kuonana na wewe.Kuna mambo ninataka kuongea nawe.” Innocent akasema na kikapita kimya kidogo.Nadhani Petro alikuwa akifikiri.

            “kwa sasa wewe uko wapi? Petro akauliza.

            “Mimi niko hapa kituo cha polisi.”

            “ kwa hiyo unataka tukutanie wapi? Petro akauliza

            “Niambie uko wapi nikufuate sasa hivi”

            Petro akamuelekeza Innocent katika baa yake naye kwa kasi akaongoza gari kuelekea kule.

TUKUTANE TENA SEHEMU IJAYO

KWA SIMULIZI ZAIDI TEMBELEA HAPA MASIMULIZI